![](https://infosot.com/wp-content/uploads/2016/10/eshtrat-640x380.jpg)
Sot në Bashkësinë lokale Zajaz Xhuma, konkretisht tek vendbanimi i lagjes Xhaka, nga Bunari i Metë Xhakës, në prani të personave nga Këshilli për ngritjen e QP ”Nëna Shqiptare” dhe banorëve lokalë si dhe familjarë të lagjes ku ndodhet kjo varrezë masive, ka filluar eksumimi i kësaj varreze dhe nxjerrja e eshtrave që ndodhen në këtë pus “bunar”.
Këto eshtra do të dërgohen për ekspertizë të mëtutjeshme, dhe më pas ato të prehen në vendin e përcaktuar, tek Qendra përkujtimore “Nëna Shqiptare”, ku tashmë janë vënë edhe emrat e tyre, dhe pas verifikimit dhe ekspertizës së duhur edhe eshtrat e tyre të prehen aty ku kanë të shënuar edhe emrin.
Sipas Musli Musliut, koordinator i Këshillit për ngritjen e QP”Nëna Shqiptare” dhe komisionit për gjetjen e të zhdukurve gjatë periudhës kur Kërçova gjatë vitesh po pushtohej nga hordhi të huaja, të cilat pas vete lenin shkrumb e hi, në këtë varrezë ndodhen njerëz të cilët janë vrarë nga hordhitë çetnike të vitit 1913 në prag të fillimit të Luftës së Parë Botërore, fill pas ikjes së perandorisë osmane nga këto troje dhe shpalljen e pavarësisë së një cope të shtetit shqiptar.
Musliu ka theksuar se “lidhur me këtë bunar, i cili është edhe varrezë masive njëkohësisht qarkullojnë shumë gojëdhëna, dhe sipas dëshmive të banorëve të këtushëm aty ndodhen përmbi 20 veta të vrarë e të masakruar, shkruan Zhurnal.
Punimet rreth nxjerrjes së eshtrave tek “Bunari Metë Xhakës”, në Zajaz Xhuma, kanë filluar gjatë ditës së diel, ndërsa gërmimet rreth nxjerrjes së eshtrave nga kjo varrezë dhe në varreza të tjera masive, të cilat janë detektuar në rrethinën e Kërçovës, do të viijojnë edhe gjatë ditëve të ardhshme.