Pas arrestimit të nënkryetarit të VV-së Driton Çaushit për hedhjen e gazit lotsjellës, ka reaguar edhe Lëvizja Vetëvendosje.
Ata thonë se deputetët e tyre po vazhdojnë të arrestohen me siç vlerësojnë ata, urdhra politikë.
“Policia e Kosovës ka arrestuar sot në Kuvend, deputetin Driton Çaushi për shkak të aksionit të tij politik për ta ndalur procedimin e marrëveshjes për demarkacionin me Malin e Zi.
Këto urdhra të përndjekjes politike për VETËVENDOSJE!-n po zbatohen në kohën e lulëzimit të krimit dhe korrupsionit nga Qeveria. Organet e Drejtësisë kanë shumë punë për të bërë. Ata do të duhej të hetonin vetë Komisionin e Murat Mehës që e ka propozuar këtë marrëveshje, aferën ‘Pronto’, ‘dosjen e shefave’, skandalin e pasaportave e shumë skandale të tjera”, bëjnë të ditur ata përmes një njoftimi për media.
Ky subjekt kërkon lirimin e menjëhershëm të deputetit Driton Çaushi. Po ashtu, e paralajmërojnë qeverinë siç e quajnë ata “kuislinge” që nuk mund të vazhdojë me kalimin e kësaj marrëveshjeje. |Kosova nuk ka tokë për të falur, kurse veprimet e tyre nuk mund të na ndalin e as frikësojnë në mbrojtjen e territorit dhe sovranitetit të Republikës”, thuhet ndër tjerash.
