Vladimir Todoriq nga Partia Demokratike e Serbisë, ka deklaruar sot se pse Vuçiq dhe Daçiq nuk i kishin përdorur më herët këto kapacitete mahnitëse diplomatike, për të parandaluar pranimin e Kosovës në UNESCO, shkruan B92.
Përveç kësaj, sekretari ndërkombëtar i demokratëve, ka pyetur kryeministrin dhe ministrin e punëve të jashtme të Serbisë, se ku ishin “kur Kosova javën e kaluar nënshkroi marrëveshjen e Stabilizim Asociimit”, dhe kur “Kosova mori kodin telefonik ndërkombëtar 383”, transmeton lajmi.net.
Sipas tij, ajo çfarë dallon nga pranimi i Kosovës në UNESCO me pranimin në të gjitha organizatat e mëparshme, është fakti se Daçiq dhe Vuçiq e dinë se aty mund të parandalojnë anëtarësimin e Prishtinës, ose ndoshta për faktin se janë shumë të ndjeshëm ndaj çështjes së kulturës “gjë që qytetarët e Serbisë e dinë mirë sa është e vërtetë”.
“Më shumë gjasa ka të jetë kjo e para, dhe se bëhet fjalë për një farsë nga e cila Aleksandar Vuçiq planifikon të dalë i kurorëzuar me lule. Qytetarët e Serbisë meritojnë një qeveri përgjegjëse që punon në interesin e tyre, e jo për bukuroshet e estradës të cilat kanë për qëllim ruajtjen e popullaritetit”, ka shtuar Todoriq.
