Në orët e hershme të mëngjesit është arrestuar Kryetari i Lëvizjes Vetëvendosje, Visar Ymeri. Arrestimi i Ymerit ka lidhje me rastin e deputetit Bekim Haxhiu, Kamishit. Sipas policisë së Kosovës Ymeri është shoqëruar në Gjykatë.
Lëvizja Vetëvendosje përmes një komunikate për media ka thënë se kryetari i saj Visar Ymeri është arrestuar sot rreth orës 09:00. Kjo, sipas VV-së, vjen si rezultat i dështimit të Qeverisë në ndërtimin e shtetit dhe zhvillimin ekonomik, dhe përmes drejtësisë që e ka kapur, ka riaktualizuar raste të para shumë viteve, vetëm sa për të shtypur kundërshtarët politikë.
Sipas Vetëvendosjes, në mungesë të çdo legjitimiteti, pushteti po synon të qeveris duke montuar raste dhe duke burgosur opozitën.
“I ndeshur me pakënaqësinë më të madhe qytetare që ka ekzistuar ndonjëherë në Kosovë, ky pushtet, në vend që të reflektojë e t’i kthehet popullit, po e shndërron veten në regjim policor totalitar, që shtyp pakënaqësinë”, thuhet në postimin e VV-së.
Lëvizja Vetëvendosje, thotë se kërkon lirimin e menjëhershëm të kryetarit të saj dhe “ndërprerjen e menjëhershme të të gjitha rasteve gjyqësore politike dhe të montuara, kundër aktivistëve të saj”.
Visar Ymeri sot herët është shoqëruar nga policia për seancën gjyqësore me rastin e përleshjes me Bekim Haxhiun, i njohur si Kamishi.
