Sot në fshati Bubavec të Komunës së Malishevës, me nderime, u varros ish deputeti i Kuvendit të Kosovës, Halit Kryeziu. Në ceremoninë e varrimit morën pjesë qytetarë të shumtë, pastaj bashkëpunëtor të Halitit, strukturat komunale të Malishevës dhe Klinës, deputet të Kuvendit të Kosovës dhe ish deputetët e Kuvendit të Kosovës, të viteve të ’90-ta.
Fjalime në ceremoninë e varrimit mbajtën, Kryetari i Komunës së Malishevës, Ragip Begaj, kryesuesi i Kuvendit të Komunës së Klinës, z.Haxhi Ibishi dhe ish deputeti i Kuvendit të Kosovës, në vitet e ’90-ta, z.Muharrem Shabani, të cilët folën për jetën dhe veprimtarinë e Halit Kryeziut, si në aspektin politik, ashtu edhe në atë profesional.
Sipas folësve, Halit Kryeziu, ishte ndër të parët, që ngriti zërin kundër vrasjeve të qytetarëve të vendit, si dhe ishte njëri prej atyre që dha një kontribut të jashtëzakonshëm në miratimin e akteve juridike, që quan deri në pavarësimin e Kosovës, e po ashtu, edhe gjatë luftës së UÇK-së, ka dhënë një kontribut të madh.
