Nënkryetari i Partisë Demokratike të Kosovës dhe numri dy në listën e kësaj partie për zgjedhjet e parakohshme parlamentare të 7 qershorit, Uran Ismaili, ka deklaruar se kryeministri Albin Kurti duhet të përballet në debat me kandidatin e PDK-së për kryeministër, Bedri Hamza.
“E mira do të ishte që zoti Kurti të mos frikësohet të dalë në debat me Bedri Hamzën. Le të dalë në debat dhe të mos mbyllet pas deputetëve të vet, të cilët duartrokasin çdo gjë që ai thotë”, u shpreh Ismaili.
Ai foli edhe për përvojën e tij pas rikthimit në Kuvend, duke komentuar mënyrën e funksionimit të grupit parlamentar të Lëvizjes Vetëvendosje.
“Pas rikthimit tim në parlament pas katër vitesh, kam parë se aty gjithçka ka, por demokraci jo. I njëjti mentalitet tani po tentohet të bartet edhe në shoqëri, ku vazhdimisht tentohet të nxihen pozitat e tjera”, tha ai. Sipas Ismailit, nëse Kurti ka vetëbesimin dhe gatishmërinë për t’u përballur me kundërshtarët politikë, atëherë duhet të jetë i gatshëm të marrë pjesë edhe në debate publike. “Nëse ka kaq shumë vetëbesim dhe mendon se është i gatshëm të përballet me këdo, atëherë duhet të dalë në debate”, shtoi ai.
