Supersport sjell nga Lyoni atmosferën në rrugët e qytetit francez që ka nisur të vishet kuqezi. Ndeshja e orës 21:00 mes Rumanisë dhe Shqipërisë ka rritur entuziazmin mes tifozëve shqiptarë të cilët e kanë nisur festën që në orët e para të mëngjesit. Gazetari Dritan Shakohoxha ndodhet mes tyre duke përcjellë në ekran festën dhe brohoritjet e tifozëve shqiptarë.
Mijëra të pranishëm pritet të jenë sonte në mbrëmje në stadium, ndërsa shumë të tjerë nga troje të ndryshme shqiptare kërkojnë që Kombëtarja e drejtuar nga Gianni De Biasi ta mbyllë fazën e grupeve me një fitore. Ndërkohë, pak kilometra më tej, në afërsi të hotelit ku është akomoduar Kombëtarja, gazetari Ylli Aga informon për të rejat më të fundit nga skuadra. Skuadra po analizon edhe detajet e fundit për takimin vendimtar ndaj Rumanisë, ndërsa mijëra mbështetës kuqezinj janë gati për të mbështetur në një tjetër ndeshje historike të besuarit e Gianni De Biasit.
