Kompania Rajonale e Ujësjellësit Prishtina ka bërë të ditur se borxhi për faturat e papaguara të ujit ka arritur në 45 milionë euro, duke e cilësuar situatën si alarmuese për të ardhmen e shërbimeve të ujësjellësit.
Përmes një postimi publik, kompania tha se ky borxh është krijuar nga mospagesat, papërgjegjësia dhe mungesa e reagimit ndër vite.
“45 milionë euro borxh për ujin… Një mal i ndërtuar me mospagesa, papërgjegjësi dhe heshtje”, thuhet në reagimin e kompanisë.
Sipas ujësjellësit, faturat e papaguara po ndikojnë drejtpërdrejt në investime dhe në ofrimin e shërbimeve për qytetarët.
“Çdo faturë e papaguar sot, është një rubinet më pak nesër, një investim i ndalur, një shërbim i rrezikuar”, theksohet në postim.
Kompania apeloi te konsumatorët që të kryejnë obligimet e tyre financiare, duke nënvizuar se uji është shërbim jetik dhe jo “mall pa vlerë”.
“Uji është jetë, jo mall pa vlerë. Ai që e përdor dhe nuk e paguan, nuk po kursen para, po vjedh të ardhmen e të gjithëve”, thuhet më tej.
Kompania e cilësoi shumën prej 45 milionë eurosh si një alarm që kërkon reagim të menjëhershëm.
“45 milionë euro nuk janë vetëm borxh. Janë alarm që kërkon ndërgjegje, drejtësi dhe veprim tani”, thotë tutje reagimi.
