Presidenti amerikan Donald Trump deklaroi sot se liderët evropianë mund të ftohen në një takim të mundshëm pasues shumëpalësh pasi të takohet me presidentin rus Vladimir Putin më vonë këtë javë.
Trump, i cili është planifikuar të niset për në samitin me rreziqe të larta të premten herët në mëngjes, tha se mendon që takimi do të jetë “i mirë”, por theksoi se “takimi më i rëndësishëm do të jetë takimi i dytë që do të zhvillojnë”.
“Do të kemi një takim me presidentin Putin, presidentin Zelensky, unë dhe ndoshta do të sjellim disa nga udhëheqësit evropianë. Ndoshta jo,” u tha Trump gazetarëve në Zyrën Ovale.
“Do të shohim se çfarë do të ndodhë. Dhe mendoj se presidenti Putin do të bëjë paqe. Mendoj se presidenti Zelensky do të bëjë paqe. Do të shohim nëse mund të merren vesh. Dhe nëse munden, do të jetë shumë mirë”, shtoi ai.
Mbetet e paqartë nëse takimi i dytë do të materializohet pasi Trump dhe Putin të mbajnë takimin e tyre.
Zëdhënësja e Shtëpisë së Bardhë, Karoline Leavitt, tha gjatë ditës se Trump do të largohet nga Shtëpia e Bardhë nesër për në Bazën e Përbashkët Elmendorf-Richardson në Anchorage Alaska, ku do të zhvillojë takimin me Putin.
Leavitt tha se Trump synon të “shterojë të gjitha opsionet” për të arritur një zgjidhje paqësore të luftës midis Rusisë dhe Ukrainës, raporton KosovaPress.
