Ish numri dy i Qeverisë së Kosovës, Behgjet Pacolli, me partinë e tij Aleancën për Kosovën e Re, po sheh tri mundësi të daljes nga kriza politike në vend.
Ato i ka shprehur në një postim të tij në Facebook:
Duke u bazuar në statusin që e drejta ndërkombëtare e gëzon në rendin kushtetues të Kosovës dhe në dispozitat e Kushtetutës së Kosovës, kemi të bëjmë me dy gjendje juridike;
1. Marrëveshjet e nënshkruara me Serbinë; E para e 2013 e ratifikuar në Kuvend me shumicën e dy të tretave dhe ajo e nënshkruar nga kryeministri në gusht të 2015. Duhet të kemi të qartë që të dy këto marrëveshje janë në fuqi dhe janë drejtpërdrejtë të zbatueshme në rendin kushtetues kosovar, e para bile me ratifikim nga Kuvendi e tjetra me nënshkrimin nga ana e Kryeministrit. Që të dyja këto janë bërë të zbatueshme menjëherë pas nënshkrimeve respektive. Këto marrëveshje sipas kushtetutës së Republikës së Kosovës nuk mund të shfuqizohen nga Gjykata Kushtetuese siç po pretendohet, sepse ajo nuk ka një juridiksion origjinal për t’i shfuqizuar ato.
2. Protestat e opozitës dhe insistimi për revokimin e marrëveshjeve ose dorëheqje të Kryeministrit si dhe gjendja juridike që është krijuar muajin e kaluar që ka të bëjë me Aktgjykimin e Gjykatës Kushtetuese në kuadër të të cilit përcaktohet se disa pjesë të marrëveshjes së nënshkruar nuk janë në përputhje me kushtetutën e Kosovës.
Sipas kuptimit të këtij aktgjykimi shihet qartë që Kryeministri i Republikës së Kosovës ka nënshkruar një tekst të marrëveshjes, i cili nuk është në përputhje me Kushtetutën.
Edhe njëherë po e theksoj se këto marrëveshje pavarësisht aktgjykimit të Kushtetueses janë në fuqi dhe prodhojnë efekte juridike për Republikën e Kosovës.
Përveç kësaj një problem shumë i madh për Kosovën do të jetë edhe mënyra se si do të zbatohet aktgjykimi i Gjykatës Kushtetuese dhe si të zbatohen rekomandimet e këtij aktgjykimi i cili duket të jetë mjaft i paqartë, edhe për faktin që Gjykata Kushtetuese në këtë aktgjykim për herë të parë përdorë një terminologji politike në përmbajtjen e aktgjykimit, e cila del jashtë praktikave të deritashme të kësaj Gjykate.
Shkelësit e Kushtetutës në kuptim të aktgjykimit të Gjykatës, në këtë rast kryeministrit, i mbeten tri rrugë;
– Të japë dorëheqje për shkaqe etike,
– Të mos përfillë përgjegjësinë etike dhe të vazhdojë në rrethanat kur opozitën në vazhdimësi do ta ketë përballe në këtë çështje. Në këtë rast do të kemi vazhdimësi të krizës dhe dëmtim të vazhdueshëm të imazhit të Kosovës ose;
– I gjithë spektri politik të jetë koshient për nevojën e shtetndërtimit dhe integrimit të Kosovës dhe në mënyrë koncensuale t’i jepet shans kryeministrit që të implementojë marveshjën dhe gjatë implementimit të marrëveshjeve (hartimit të statutit) të jetë i kujdesshëm dhe transparent në veprimet e tij.
