Një konflikt për ndarjen e pasurisë pas divorcit për pak sa nuk u kthye në një tragjedi të vërtetë mbrëmjen e së premtes në Tiranë.
Marjan Levanti shkoi në banesën e ish-bashkëshortes dhe sulmoi me thikë familjarët e saj. Policia e kryeqytetit njoftoi se ai plagosi ish-vjehrrin, ish-vjehrrën dhe ish-kunatin.
Ngjarja ndodhi në një banesë në zonën e Unazës së Re. Tre familjarët e plagosur u dërguan menjëherë në spital ku edhe ju dha ndihma mjekësore pas plagëve të marra. Ata janë jashtë rrezikut për jetën.
Rreth dy orë pas ngjarjes, policia bëri të mundur arrestimin e 37-vjeçarit Marjan Levanti.
Autori i kësaj ngjarje nuk është një emër i panjohur për policinë. Ai ka qenë i dënuar për plagosje dhe ka vuajtur 2 vite burg.
Bashkëshortja i kishte kërkuar menjëherë divorcin vitin e shkuar sapo ai kishte dalë nga burgu. Gjykata ka dhënë vendimin disa muaj më parë, por ai nuk ka qenë dakord me ndarjen e pasurisë, gjë që ka sjellë edhe ngjarjen në familjen e ish-bashkëshortes së tij.