Atmosfera u tensionua në stadiumin Orange Vélodrome pasi Olympique de Marseille barazoi 2-2 ndaj Strasbourg, në një ndeshje që shkaktoi reagime të ashpra nga tifozët vendas.
Sipas raportimeve, rreth 20–30 tifozë tentuan të futeshin në zonën presidenciale pas përfundimit të takimit. U hodhën objekte dhe forcat e sigurisë mbyllën hyrjet për të parandaluar përshkallëzimin e situatës, ndërsa policia ndërhyri për të rikthyer qetësinë.
Në fushë, Marseille kishte krijuar epërsi 2-0, me një gol të bukur nga Amine Gouiri, por Strasbourg reagoi dhe arriti të barazojë, duke siguruar pikën me një penallti në minutat e fundit.
Ndeshja nisi me një atmosferë të nxehtë, pasi një pjesë e tifozëve bojkotuan 15 minutat e para dhe shfaqën pankarta kundër lojtarëve dhe drejtuesve të klubit. U dëgjuan vërshëllima gjatë takimit, ndërsa një bombë tymi u hodh në fushë.
Pakënaqësia te klubi është shtuar pas largimit të trajnerit Roberto De Zerbi, me Jacques Abardonado që ka marrë drejtimin si trajner i përkohshëm. Rezultati i radhës pa fitore ka thelluar krizën dhe pasigurinë rreth klubit marsejez.
