Presidenti i Kosovës, Hashim Thaçi, ka thënë se vendimi i Gjykatës Kushtetuese rreth pronës kishtare në Deçan është i bazuar në Kushtetutën e Shtetit dhe Konventën Evropiane për të Drejtat e Njeriut.
“Kosova është shtet ligjor ku vendimet gjyqësore respektohen. Prona është e patjetërsueshme, e kujtdoqoftë ajo”, ka thënë Thaçi.
Të premten, Gjykata Kushtetuese e Kosovës i ka dhënë fund një mosmarrëveshjeje të gjatë ligjore në favor të Manastirit të Deçanit.
Gjykata ka konfirmuar pronësinë e Manastirit mbi 24 hektarë tokë, e cila për vite të tëra është kontestuar.
Banorët e Deçanit dhe zyrtarët komunalë patën zhvilluar disa protesta në vitin 2013, duke thënë se manastiri është objekt kulti i shqiptarëve e jo i serbëve.
Pakënaqësitë patën kulmuar pas një një vendimi të nxjerrë nga Dhoma e Posaçme e Gjykatës Supreme në Kosovë, i cili thoshte se 24 hektarë tokë, që dy ndërmarrje shoqërore pretendonin se janë pronë e tyre, i mbesin në administrim Manastirit të Deçanit.
Gjykata Kushtetuese ka marrë të premten vendimin mbi kërkesën e parashtruar nga Manastiri i Deçanit, që është prezantuar nga Dragutin (Sava) Janjiq, kryemurg i këtij manastiri.
