Zëvendëskryeministri i parë dhe ministri i Punëve të Jashtme të Republikës së Kosovës, Hashim Thaçi, po qëndron në Holandë ku po merr pjesë në Konferencën e katërt Globale për Sajber Hapësirën.
Thaçi është në mesin e mbi 40 ministrave dhe sekretarëve shtetërorë nga të gjitha kontinentet, duke përfshirë edhe vendet që nuk e kanë njohur Kosovën, që po marrin pjesë në konferencën dyditore në Hagë. Në mesin e pjesëmarrësve do të jenë edhe përfaqësues të organizmave kryesorë ndërkombëtarë duke përfshirë z. Thorbjørn Jagland, Sekretar i Përgjithshëm i Këshillit të Evropës, znj. Federica Mogherini, Përfaqësuese e Lartë e Bashkimit Evropian për Punë të Jashtme dhe Politika të Sigurisë, z. Carl Bildt, ish-kryeministër i Suedisë dhe drejtues i Komisionit Global për qeverisje të internetit, zyrtarë të lartë të NATO, UNESCO, EUROPOL, dhe INTERPOL, njofton kumtesa nga MPJ.
Të pranishëm në konferencë do të jenë edhe përfaqësues të OJQ-ve të njohura botërore, ekspertë të universiteteve prestigjioze globale dhe anëtarë të bordeve të kompanive kryesore të teknologjisë informative si Facebook, Microsoft, ICANN, Cisco.
Konferenca është hapur nga kryeministri holandez, z. Mark Rutte. Synimi i kësaj konference është nxitja e bashkëpunimit praktik mes shteteve, biznesmenëve, institucioneve shkencore për harmonizimin e standardeve dhe normave ndërkombëtare të qasjes së përgjegjshme në sajber hapësirë.
Zëvendëskryeministri Thaçi po merr pjesë sonte në një darkë të përbashkët me ministrat, sekretarët shtetërore të vendeve të tjera pjesëmarrëse dhe mysafirët e tjerë të konferencës.
Nëser, z. Thaçi do të ketë një takim bilateral me homologun e tij holandez, z. Bert Koenders, me të cilin do të bisedojë për thellimin e bashkëpunimit mes Republikës së Kosovës dhe shtetit holandez, e veçanërisht në rrafshin ekonomik.
