Presidenti i Kosovës, Hashim Thaçi, në ditën e dytë të vizitës së tij zyrtare në Slloveni, ka marrë pjesë sot edhe në hapjen e Forumit Ekonomik Kosovë-Slloveni, të organizuar nga dhomat ekonomike të Sllovenisë dhe të Kosovës.
Forumi është hapur nga presidenti Thaçi dhe homologu i tij slloven, Borut Pahor, transmeton Koha.net
Presidenti Thaçi u shpreh se Sllovenia, si investitorja e dytë më e madhe në Kosovë, është partnere e rëndësishme ekonomike e Kosovës.
“Marrëveshja e Stabilizim-Asociimit dhe inkuadrimi në Korporatën e Sfidave të Mijëvjeçarit (MCC) përbëjnë një konfirmimin të radhës të përkushtimit të Kosovës në jetësimin e reformave të thella në ekonomi, politikë dhe sundim të ligjit”, ka thënë Thaçi para të pranishmëve.
I pari i vendit, sipas komunikatës së Presidencës, theksoi se këto të arritura të Kosovës reflektojnë një besim më të madh të bizneseve për të investuar në Kosovë dhe për potencialet e Kosovës për zhvillim ekonomik.
Nga ana tjetër, homologu i presidentit Thaçi, Presidenti i Republikës së Sllovenisë, Borut Pahor, tha Sllovenia ka përvojë të çmueshme në zhvillimin ekonomik të vendit dhe se shtetet e tjera duhet të marrin shembull nga shteti slloven.
Zëvendëspresidenti i Odës së Ekonomisë dhe Industrisë së Sllovenisë, Martin Novshak, tha se ky forum është rast i mirë për të kërkuar mundësitë për thellimin e bashkëpunimit ekonomik mes dy shteteve.
Ndërsa, Kryetari i Odës Ekonomike të Kosovës, Safet Gërxhaliu, theksoi se diskutimet janë posaçërisht të përqendruara në çështjet që kanë të bëjnë me Evropën, ekonominë, mjedisin, arsimin dhe përvojën.
Të pranishëm në këtë forum ishin edhe kryetari i komunës së Shtimes, ai i Rahovecit, Istogut, Lipjanit dhe Kastriotit, si dhe përfaqësues të tjerë të Odës Ekonomike të Kosovës dhe afaristë nga Kosova dhe Sllovenia.
Ndërkaq, dje, Presidenti i Republikës së Kosovës, Hashim Thaçi, është pritur nga krerët e shtetit slloven, homologu i tij, Borut Pahor, kryeministri Miro Cerar, si dhe kryebashkiaku i Lubjanës, Zoran Jankoviq.
