Kryeministri suedez ka deklaruar se vendi i tij nuk është as në luftë dhe as në paqe, ndërsa njoftoi se Suedia do të dërgonte forca të armatosura në Detin Baltik për herë të parë si pjesë e përpjekjeve të shtuara të mbikëqyrjes mes një vale të dyshuar sabotimi të kabllove nënujore.
Vendi njoftoi se do të kontribuojë deri në tre anije luftarake dhe një aeroplan vëzhgimi në një përpjekje të NATO-s për të monitoruar infrastrukturën kritike dhe “flotën hije” të Rusisë, ndërsa aleanca përpiqet të mbrohet nga sabotimi i infrastrukturës nënujore.
Duke folur në hapjen e konferencës vjetore tre-ditore të Suedisë Folk och Försvars (populli dhe mbrojtja) në Sälen, Suedi veriore, Ulf Kristersson komentoi gjithashtu ndërprerjet e fundit të kabllove nënujore të Balltikut, duke thënë se “synimi armiqësor nuk mund të përjashtohet”.
Mes sulmeve hibride dhe luftërave, Kristersson tha: “Suedia nuk është në luftë. Por nuk ka as paqe”.
Ai shtoi: “Paqja e vërtetë kërkon lirinë dhe mungesën e konflikteve serioze midis vendeve. Por ne dhe fqinjët tanë jemi të ekspozuar ndaj sulmeve hibride, të kryera jo me robotë dhe ushtarë, por me kompjuterë, para, dezinformata dhe rrezik të sabotimit. Ata që duan paqen, duhet të jenë të përgatitur për luftë”.
Bëhet e ditur se në një konferencë të mëvonshme për shtyp, Kristersson tha se Suedia do të dërgonte një aeroplan zbulues ASC 890 dhe deri në tre anije luftarake në Detin Baltik, shkruan the Guardian.
“Kjo është hera e parë që Suedia ka kontribuar me forca të armatosura në zonën tonë të afërt”, tha ai.
Kryeministri suedez komentoi edhe hetimin për anijen Eagle S, e dyshuar për dëmtimin e një kablloje midis Finlandës dhe Estonisë muajin e kaluar, për të cilin tha se “NATO është gati për të ndihmuar”.
Ndërkohë, kryeministri i Finlandës, Petteri Orpo tha se ndërprerja nuk kishte ndikuar në furnizimin me energji elektrike të vendit.
“Suedia nuk nxiton në përfundime apo nuk akuzon askënd për sabotim pa arsye shumë të forta. Puna vazhdon dhe Këshilli i Sigurisë Kombëtare përditësohet në mënyrë të vazhdueshme”, tha Orpo.
“Por edhe ne nuk jemi naivë. Situata e sigurisë dhe fakti që gjëra të çuditshme ndodhin herë pas here në Detin Baltik na bëjnë gjithashtu të besojmë se qëllimi armiqësor nuk mund të përjashtohet”, shtoi ai.
Ndryshe, Orpo njoftoi se do të takohet me krerët e shteteve dhe qeverive të Detit Baltik në Helsinki, kryeqytetin e Finlandës, të martën.
Raportohet se Suedia kontribuon me 2.4% të GDP-së në NATO, një shifër që do të rritet për 2.6% në tre vjet.
Gjithashtu, do të rriten edhe shpenzimet për mbrojtjen civile, me ndërtimin e një qendre të re kombëtare të sigurisë kibernetike.
