Një studim i publikuar nga New England Journal of Medicine ka zbuluar se edhe amerikanët më të pasur nuk jetojnë më gjatë se njerëzit më të varfër në vendet e zhvilluara të Europës Perëndimore dhe Veriore.
Analiza përfshiu mbi 74 mijë persona të moshës 50–85 vjeç nga SHBA dhe 16 vende europiane, të ndjekur nga viti 2010 deri më 2022.
Rezultatet tregojnë se pavarësisht pasurisë, amerikanët përballen me jetëgjatësi më të ulët krahasuar me evropianët – madje edhe me ata që kanë të ardhura më të ulëta.
Pse ndodh kjo?
Sipas studiuesve, arsyeja nuk është thjesht pasuria në vetvete, por sistemet sociale dhe shëndetësore ku njerëzit jetojnë.
Në SHBA, ndarja e thellë mes të pasurve dhe të varfërve shoqërohet me mungesë sigurie sociale, akses të kufizuar në kujdes shëndetësor cilësor dhe stres të vazhdueshëm, që prekin të gjitha shtresat – përfshirë edhe të pasurit.
“Edhe më të pasurit nuk janë të mbrojtur nga problemet sistemike që ulin jetëgjatësinë në SHBA,” tha Irene Papanicolas, ekonomiste shëndetësore në Universitetin Brown në SHBA, që udhëhoqi studimin.
Krahasimi me vendet si Holanda, Franca apo Gjermania, tregon se sistemi i fortë i mbrojtjes sociale dhe shëndetësore në këto vende mbron edhe shtresat më të brishta – dhe krijon kushte më të mira jetese për të gjithë, jo vetëm për elitën.
