Dhomat e Specializuara të Kosovës, të njohura ndryshe si Gjykata Speciale, kanë publikuar sot disa pamje nga hapësirat e Qendrës së Paraburgimit, ku po mbahet Hashim Thaçi dhe të akuzuarit tjerë, në Hagë.
Në këtë video, Specialja “lëvdohet” se si të akuzuarit këtu kanë kushte të mira.
“Të paraburgosurit në Hagë kanë çdo ditë qasje në ajër të pastër dhe aktivitete fizike. Ata mund të marrin pjesë në aktivitete sportive, të gatuajnë dhe të ndajnë ushqimet së bashku, si dhe të socializohen”, thuhet mes tjera, në material viziv, të publikuar në X, transmeton KosovaPress.
Specialja është kujdesur të tregojë se gjatë muajit, të paraburgosurit mund të bëjnë dhe të pranojnë thirrje telefonike, të kenë korrespondencë dhe se “ata kanë 10 ditë në muaj për vizita nga anëtarët e familjes, miqtë dhe të njohurit.
“Të paraburgosurit mund të marrin pjesë në shërbesa fetare. Ata kanë qasje edhe në materiale për shkrim”, thuhet më tutje në video. “Po ashtu, ata kanë qasje në programe radiofonike dhe televizive në gjuhën shqipe, si dhe në libra, revista dhe gazeta”.
Specialja ka thënë se “paraburgimi para ose gjatë gjykimit vendoset vetëm kur konsiderohet i domosdoshëm për të parandaluar një rrezik të konsiderueshëm, siç është mundësia që i akuzuari të tentojë të frikësojë ose të ndikojë te dëshmitarët”.
“Çdo dy muaj, gjyqtarët e Dhomave të Specializuara rishikojnë masën e paraburgimit për të vlerësuar nëse ajo vazhdon të jetë e nevojshme dhe e arsyeshme”, thuhet në njoftimin e Speciales në X. /KosovaPress/
