Një ngjarje e rëndë me dy jetë të humbura ndodhi këtë mëngjes në kryeqytet, duke dëshmuar edhe një herë situatën problematike të sistemit shëndetësor në Shqipëri. Një nënë 35-vjeçare humbi jetën në sallën e operacionit në maternitetin “Koço Gliozheni” së bashku me fëmijën e saj në muajin e nëntë të shtatzënisë.
Familjarët akuzojnë mjekët për humbjen e dy jetëve, ndërsa Prokuroria e Tiranës ka nisur hetimet duke marrë në pyetje mjekët që kanë qenë në shërbim. Janë marrë në pyetje 4 mjekët që asistuan lindjen e 35-vjeçares, ndërsa është sekuestruar edhe kartela e pacientes.
Sipas kunatit të 35-vjeçares të ndarë nga jeta Aida Koçi me banim në Paskuqan, ata kanë kaluar peripeci dhe zvarritje nga mjekët derisa e afërmja e tyre nuk mundi të mbijetonte.
Sipas kunatit, Aida mbrëmjen e së enjtes, Aida ka nxjerrë dhimbje në shpinë, e menjëherë ata e kanë transportuar me makinë drejt maternitetit “Koço Gliozheni” duke mbërritur atje për 10 minuta.
Që në këtë moment – rrëfen ai për News 24- ata janë përballur me neglizhencë të bluzave të bardha. Urgjenca ka qenë e mbyllur, dhe doktoresha ka ardhur pas gjysëm ore.
“Urgjenca ishte e mbyllur me kyç, pritëm 20 minuta për tu hapur, ishte vetëm infermierja. Kunata nuk kishte as stol ku të ulej, po e mbanim për krahu se kishte të vjella. Infermierja merr doktoreshën i thotë hajde shpejt se kam një paciente me të vjella. Vjen doktoresha me doktorin pas gjysmë ore”, tregon ai.
Pas një vizite të thjeshtë që i kanë bërë në urgjencë duke e pyetur se ku ndjen dhimbje, mjekët e kanë adresuar për në Qendrën Spitalore Universitare “Nënë Tereza”.
“Mjekët na thanë: Nuk është për ne, është për QSUT. Vetëm sa e kanë pyetur ku të dhemb, as një lloj analize as ekzamimin. E mbajtën 10 minuta. Për fëmijën nuk e vizituan. Shkojmë në QSUT, i bëjmë analizat, gjysmat i bëmë privatisht. Tensionin e kishte 5 me 3. U zverdh u nxi”, – thotë më tej kunati i Aida Koçit.
Sipas tij, mjekët në QSUT i thanë se 35-vjeçarja mund të ketë të ftohur ndaj i kanë thënë ta çojnë në Sanatorium.
“Edhe atje doli e pastër. Erdhëm prapë tek materniteti, nga ora 2 e mëngjesit. Erdhi me ambulancë, na shoqëroi doktoresha e Sanatoriumit. Ndenjëm në ambulancë me dyer të hapura se nuk kishte barelë – nuk kishte spitali oksigjen, u vonuan dhe 20 minuta. Në orën 5 të mëngjesit ka ardhur kirurgu. Në 5 të mëngjesit, doktorët thonë fëmija është i vdekur por do shpëtojmë nënën. Arsyen pse vdiq fëmija nuk na dhanë, do e zbulojë mjekësia ligjore”, shprehet kunati i të ndjerës.
Fatjoni, vëllai i 35-vjeçares që humbi jetën, thotë se lajmin e rëndë për motrën e tij ja ka komunikuar policia dhe jo mjekët.
Aida Koçi u nda nga jeta në muajin e nëntë bashkë me foshnjën e saj. Ajo ka edhe dy fëmijë të tjerë, një djalë dhe një vajzë, të cilët fatkeqësisht do të rriten pa nënën e tyre. Bashkëshorti i saj, emigrant në Itali, është kthyer në atdhe pas ngjarjes së rëndë
