Sokol Haziri, ka reaguar ashpër ndaj vendimit të Qeverisë së Kosovës për shpërndarjen e nga 100 euro për qytetarët pak ditë para zgjedhjeve, duke e cilësuar këtë veprim si keqpërdorim të parasë publike për qëllime elektorale.
Në reagimin e tij publik, Haziri ka deklaruar se ndihma për qytetarët duhet të jetë obligim institucional dhe jo mjet për ndikim politik në prag të votimit.
“Qytetarët e Kosovës nuk kanë nevojë për ‘dhurata zgjedhore të babadimrit’, por për paga më të larta, zhvillim ekonomik, vende pune dhe politika afatgjata sociale”, ka theksuar ai.
Sipas Hazirit, përdorimi i buxhetit të shtetit për përfitime politike cenon standardet demokratike dhe integritetin e procesit zgjedhor. Ai ka ngritur dyshime se ky vendim mund të ketë për qëllim ndikimin e votuesve në prag të zgjedhjeve dhe ka paralajmëruar se mund të ekzistojnë elemente të veprave penale që lidhen me cenimin e procesit zgjedhor, bazuar në Kodin Penal të Kosovës dhe legjislacionin zgjedhor.
Haziri e ka cilësuar këtë praktikë si “recidivizëm të qëllimshëm për manipulim”, duke shprehur shpresën që, sipas tij, të jetë rasti i fundit i përdorimit të mjeteve publike për ndikim elektoral.
Në fund të reagimit të tij, ai ka theksuar se “vota e qytetarëve nuk blihet me 100 euro” dhe se dinjiteti i qytetarëve të Kosovës është më i vlefshëm se çdo përpjekje për manipulim me paratë e taksapaguesve./rajonipress
