Përfaqësuesit e Kosovës ose nuk janë mysafirë interesantë për të marrë pjesë në këtë konferencë,ose kësaj herë janë “ndëshkuar” nga organizatori, për shkak të situatës në Kosovë. Sidoqoftë në Konferencën e Sigurisë e 52’ta me radhë që mbahet në qytetin gjerman të Munich’ut askush nga pala kosovare nuk ishte i pranishëm. Atje kanë qenë të pranishëm pothuajse të gjithë nga rajoni, përfshirë Ministrin e Jashtëm të Serbisë dhe Ministrin e Jashtëm e Shqipërisë.
Liderët kosovarë e kanë pasur shumë për qejf pjesëmarrjen në këtë konferencë. Atje trajtohen tema shumë të rëndësishme që kanë të bëjnë me politikën dhe çështjet e sigurisë ndërkohë që edhe lista e pjesëmarrësve është shumë impresive.
Në të kaluarën Kosova është përfaqësuar edhe nga Presidenti Fatmir Sejdiu, Presidentja e Kosovës Atifete Jahjaga dhe nga Kryeministri Hashim Thaçi. Madje dy vite më parë, Kryeministri Thaçi bashkë me Kryeministrin Dacic kishin qenë ndër “yjet e konferencës”, kur në agjendën e konferencës ishte trajtuar çështja e dialogut Kosovë- Serbi.
Organizatorët e kësaj konference të cilën e kryeson Ambasadori Wolfgang Ischinger, janë kujdesur që ta promovojnë Kosovën duke i nderuar me ulëset e para. Por, pavarësisht se në një nga panelet e kësaj konferencë që është mbajtur nga 12-14 shkurt, është diskutuar për integrimet e rajonit, aty nuk ka qenë i ftuar askush nga Kosova.
Aty është ftuar Presidenti i Maqedonisë Gjorge Ivanovic, Presidenti i Sllovenisë Borut Pahor, Presidentja e Kroacisë Kolinda Grabara Kitarovic, Kryeministri i Malit të Zi Milo Djukanovic ndërkohë që takimi paneli është moderuar nga Ministri i jashtëm i Austrisë Sebastian Kurz.
Të pranishëm aty kanë qenë edhe Ministrat e Jashtëm të Serbisë Ivica Dacic dhe Kryediplomati shqiptar Ditmir Bushati. Këtu mund ta shihni listën e pjesëmarrësve në këtë konferencë.
