Shtëpia e Bardhë publikoi foto bardhë e zi të presidentëve Donald Trump dhe Volodymyr Zelensky sot pasdite në Uashington.

Postimi u shoqërua me një citat të presidentit amerikan nga një takim në tryezë të rrumbullakët, në të cilin ai iu referua marrëveshjes SHBA-NATO që u lejon vendeve të blejnë armë amerikane për t’i dërguar në Ukrainë.

Trump tha se SHBA nuk po e bën këtë pasi është një “marrëveshje shumë e mirë”.

“Ne jemi të përfshirë në këtë për të shpëtuar mijëra jetë”, tha ai, raporton KosovaPress.

Pas takimit, presidenti ukrainas iu përgjigj interesimit të mediave, duke thënë se Ukraina mund të ofrojë “mijëra dronë” nëse SHBA lejon përdorimin e raketave Tomahawk.

“Prandaj, ku mund të bashkëpunojmë, ku mund të forcojmë prodhimin amerikan. Kemi një ofertë të madhe në lidhje me dronët tanë”, tha ai.

Presidenti Trump u pyet nëse do të ishte i interesuar për një marrëveshje të tillë.

“Po, do të ishim të interesuari. Tani për tani kemi shumë dronë. Ne ndërtojmë tonin, por blejmë edhe dronë nga të tjerët, dhe ata (ukrainasit) prodhojnë dronë shumë të mirë”, tha ai.

I pyetur nga mediat se çfarë mendon për përdorimin e raketave Tomahawk nga Ukraina për të goditur më thellë Rusinë, Trump tha: “Është një përshkallëzim, por do të flasim për këtë.”

Duke folur rreth një takimi të mundshëm trepalësh, Trump tha se ka shumë “përçarje” midis Volodymyr Zelensky dhe Vladimir Putin.

“Ata dy udhëheqës nuk e pëlqejnë njëri-tjetrin dhe ne duam ta bëjmë të këndshme për të gjithë. Pra, në një mënyrë ose në një tjetër, ne do të përfshihemi në formatin trepalësh, por ndoshta do të jetë i ndarë”, tha Trump.

“Epo, do të shohim se çfarë ndodh. E dini çfarë? Mendoj se do të ndodhë. Mendoj se Presidenti Putin dëshiron t’i japë fund luftës, përndryshe nuk do të flisja kështu”, shtoi ai.

Kujtojmë se Ukraina po i kërkon SHBA raketa Tomahawk që mund të godasin objektiva pothuajse 2 mijë kilometra larg.

Një nga gazetarët e pranishëm e pyeti Zelenskyn nëse do të bënte ndonjë lëshim për t’i dhënë fund luftës në Ukrainë, presidenti ukrainas tha se ishte “gati të fliste në çdo format”.

“Bilateral, trepalësh – nuk ka rëndësi. Vetëm paqja. Kjo është e rëndësishme”.

Sipas tij, sigurimi i garancive dypalëshe të sigurisë me SHBA është dokumenti më i rëndësishëm pasi “SHBA është shumë e fortë”./kp