Drejtori i Radio Televizionit të Kosovës, Mentor Shala në Ballë për Ballë të Klan Kosovës ka folur për kërkesën e Agjencisë Kosovare të Pronave që RTK t’i lirojë ambientet ku funksionon.
Ai ka deklaruar se nuk kanë zgjedhje, për shkak se institucioni nuk ka prona të veta dhe se për këtë gjë duhet të mendojë Kuvendi i Kosovës, njofton Klan Kosova.
“Neve na është thënë që t’i lëshojmë ambientet, pasi në rast të kundërt do të na nxjerrin me polici. Por ne nuk kemi ku të shkojmë, as mund të mendojmë ku të shkojmë, pasi kudo që të shkojmë do të na thonë uzurpatorë – ngase nuk kemi prona tonat. Për këto gjëra duhet të mendojë Kuvendi i Kosovës, që është themelues i mediumit publik”.
“Nëse ndodh, nuk ka nevojë të na tërheqin zvarrë pasi dalim vet. Pamje të tilla janë vetëm ato të viteve të 90-ta, kur regjimi i shkuar i ka nxjerrë me dhunë ish punëtorët e RTP-së. Ligji thotë se Kuvendi i Kosovës me një vendim të veçantë mund të gjej zgjidhje për pronat e RTK-së”.
Shala ka theksuar se kjo situatë mund të jetë presion që RTK të mos vazhdojë ta kërkojë linjën financuese – duke mos e cilësuar si tendencë për kontroll, por më shumë për tërheqje vërejtje.
“Ne jemi duke zhvilluar një betejë me kastën politike, lidhur me mënyrën e financimit të mediumit. Ky veprim i AKP-së mendojmë se është njëfarë-lloj “mbylle gojën, mos kërko financim se të largojmë edhe nga ambientet”. Unë vetëm i përmenda rrethanat në të cilat jemi. Ky nuk është tentim për kontroll, por presion që të jemi më të kujdesshëm në raportime, gjë të cilën e bëjnë politikanët në të gjithë botën, por ne do të qëndrojmë”.
Sa i përket hapësirës që u ofrohet strukturave politike në mbulimin nga Radio Televizioni i Kosovës, ai ka deklaruar se nuk ka anim dhe se si pozita si opozita kanë hapësirën e tyre në platformë, njofton Klan Kosova.
“Në bazë të statistikave që i bëjnë organizatat e ndryshme, në RTK del më shumë e përfaqësuar opozita se qeveria, por që nuk është aspak me rëndësi, pasi lajmi është me rëndësi, jo cila palë. Nuk ka ndonjë raportim me tendenca në medium. Të gjithë kanë hapësirë në Radio Televizionin e Kosovës”.
