Që nga e marta sheshet “Skënderbeu” dhe “Ibrahim Rugova” kanë marr një pamje tjetër. Tani, punëtorët e Fabrikës së Tubave të Ferizajt nuk janë të vetmit që protestojnë. Aty janë vendosur edhe protestuesit e partive opozitare të cilët kërkojnë parandalimin e zgjedhjes së Thaçit president.
Përkrah protestuesve, në këto tenda qëndrojnë edhe liderët e partive opozitare dhe herë-herë vizitohen nga pjesëtarë të shoqërisë civile. Ata thonë se janë të vendosur për të rrëzuar Qeverinë e Kosovës dhe për ta evituar zgjedhjen e presidentit të ri, në mënyrë që vendi të shkojë në zgjedhje të parakohshme, transmeton kosovapress.
Në “Sheshin e kundërshtimeve”, siç po e quajnë opozitarët, njerëzit po shoqërohen me tingujt e këngëve heroike, të tjerët luajnë shah, e disa diskutojnë me njëri-tjetrin për zhvillimet politike dhe shoqërore.
Disa të rinj sonte bënin gati edhe pankartat me mbishkrime për protestën e nesërme, ku do të protestojnë kundër seancës së nesërme të Kuvendit të Kosovës për zgjedhjen e presidentit.
Numri i protestuesve veç sa është rritur, tha Rexhep Selimi, deputet i Lëvizjes Vetëvendosje.
Selimi tha se njerëzit po mblidhen çdo ditë e më shumë për të kundërshtuar Qeverinë dhe marrëveshjet që ajo ka nënshkruar me dy shtetet fqinjë, Serbinë e Malin e Zi.
“Ajo çfarë po shihet këtu… duket një vendosshmëri e qytetarëve, normalisht edhe e opozitës së bashkuar me kursin dhe qëllimin tonë tashmë të ditur. Kështu që, për çdo natë e më shumë njerëzit po mblidhen për të qenë më të gatshëm gjatë ditës së nesërme për ta kundërshtuar Qeverinë me gjithë marrëveshjet e tyre”, tha Selimi.
Qytetarët dhe opozita nuk po i numërojnë ditët që kur janë vendosur në këto tenda, përball Kuvendit të Kosovës, pasi në vend të kësaj po numërojnë ditët e mbetura të Qeverisë.
Ndryshe nga seanca e kaluar ku opozita ishte e përjashtuar, nesër deputetët e opozitës do të marrin pjesë në seancën e Kuvendit me të vetmin qëllim, kundërshtimin Thaçit president.
“Në vend që t’i numërojmë netët e qëndrimit këtu, kemi filluar t’i numërojmë ditët e Qeverisë atje. Kështu që njerëzit po bashkohen në rrugën tonë të drejtë… Opozita do të marr pjesë (në seancë) me format e saj, me kursin e saj, me metodat e saj për ta kundërshtuar një gjë të tillë, jo për ta votuar, kuptohet. Tashmë deputetët e Kuvendit të Kosovës janë ndarë në dysh, në ata që e kundërshtojnë dhe në ata që e duan Thaçin president”, tha Selimi.
Selimi tha se opozita mënyrat e demonstrimit të protestës i ka të ndryshme, por qëllimin e ka të njëjtë.
“Nëse Mustafa nuk vazhdon të reflektojë dhe mazhoranca nuk vazhdon të reflektojë ne do ta vazhdojmë protestën ton ë, qoftë nesër qoftë pasnesër, derisa Qeveria të zhbëhet. Mënyrat e protestës i kemi të ndryshme, kursin e kemi të njëjtë dhe qëllimin e kemi të njëjtë “, tha Selimi.
Në ndërkohë, frika e opinionit kosovar se mund të ndodh një përplasje mes protestuesve kundër Thaçit dhe simpatizantëve të tij nuk ekziston më, pas lutjes që ky i fundit i bëri përkrahësve të PDK-së që të protestojnë në shtëpi për të evituar konfliktet dhe dhunën në rrugë.
