Shtyrja për më vonë e vendimit për pranimin e Kosovës në UNESCO është e barabartë me ndalimin për hyrje të Kosovës në këtë organizatë.
Kështu ka deklaruar zëvendësministri i Punëve të Jashtme, Petrit Selimi.
“Shtyrja e vendimit për Kosovën është e njëjtë me ndalimin e hyrjes së Kosovës në UNESCO. Pse të shtyhet. S’ka kurrfarë kuptimi të anulohet diçka që veçmë është punë e kryer”, ka thënë Selimi për televizionin serb B92.
Ai ka theksuar se UNESCO në statutin e vet e përkrah paqen në botë përmes bashkëpunimit në shkencë, kulturë dhe arsim, për ç’arsye Qeveria e Kosovës konsideron se anëtarësimi i vendit në UNESCO do të ishte në favor të paqes në Ballkan më shumë sesa Kosova jashtë UNESCO-s, transmeton kp.
Sipas disa paralajmërimeve, Serbia dhe Rusia nesër në Paris, në seancën e UNESCO-s ku pritet të vihet në votim anëtarësimi i Kosovës në këtë organizatë, do të kërkojnë anulimin e votimit për pranimin e Kosovës deri në dy vjet.
Për të kaluar kjo kërkesë e Beogradit dhe Moskës, këtyre u nevojitet një shumicë e thjeshtë, prej 51 për qind të anëtarëve me të drejtë vote.
