Delegacioni kosovar në Paris, bashkë me shtetet që kanë ndihmuar Kosovën në arenën ndërkombëtare, është duke luftuar për çdo votë që do ta çonte Kosovën në UNESCO, tashmë kur kanë mbetur më pak se 24 orë deri në çastin kur Konferenca e Përgjithshme do ta hedhë në votim këtë çështje.
Zëvendësministri i Jashtëm, Petrit Selimi, ka deklaruar për Politiko.net se është një betejë e vërtetë në istikame diplomatike.
“Lobimi po vazhdon edhe sot. Zëvendëskryeministri Hashim Thaçi ka aranzhuar takime këto 24 orë, ndërsa ne e dimë që e kemi shumicën e garantuar të thjeshtë, por po luftojmë që ta kemi shumicën e 2/3 që nevojiten ligjërisht”.
“Është betejë e vërtetë në istikame diplomatike, ku çdo votë është e rëndësishme”, ka thënë Selimi për Politiko.net.
Votimi për anëtarësimin e Kosovës në UNESCO është planifikuar si pikë e veçantë e rendit të ditës në Konferencën e Përgjithshme – e që do të mbahet nesër në orën 11:30.
Konferenca e Përgjithshme ka 195 anëtarë, nga të cilët 111 e kanë njohur Kosovën dhe 84 jo. Rekomandimit për pranimin e Kosovës i duhen 2/3 e votave për të kaluar.
Por, cilat janë pritjet reale të Kosovës? Zëvendësministri Petrit Selimi ka qenë i kujdesshëm në përgjigjen e tij.
“Optimizëm i kujdesshëm”, është shprehur ai. / Politiko.net
