Kancelari gjerman, Olaf Scholz, është shprehur kundër paralajmërimit rus, se do mbajnë stërvitje bërthamore.
Në një reagim në platformën X, Scholz, thotë se armët bërthamore nuk duhet të përdoren në këtë luftë.
”Në lidhje me stërvitjen bërthamore të shpallur nga Rusia: Është gjithmonë e rëndësishme të thuhet qartë se armët bërthamore nuk duhet të përdoren në këtë luftë.”
Përndryshe, gjatë ditës së sotme, Rusia ka kërcënuar se do të godiste objektet ushtarake britanike dhe tha se do të zhvillonte stërvitje që simulojnë përdorimin e armëve bërthamore në fushën e betejës, mes tensioneve në rritje të mprehtë mbi komentet e zyrtarëve të lartë perëndimorë për përfshirjen e mundshme më të thellë në luftën në Ukrainë.
Pasi thirri ambasadorin britanik në Ministrinë e Jashtme, Moska paralajmëroi se sulmet ukrainase në territorin rus me armë të furnizuara nga Britania e Madhe mund të sjellin sulme hakmarrëse kundër objekteve dhe pajisjeve ushtarake britanike në tokën ukrainase ose më gjerë.
Vërejtjet erdhën në prag të inaugurimit të presidentit rus Vladimir Putin për një mandat të pestë në detyrë dhe në një javë kur Moska të enjten do të festojë Ditën e Fitores, festën e saj më të rëndësishme laike, duke shënuar humbjen e Gjermanisë naziste në Luftën e Dytë Botërore.
Stërvitjet janë një përgjigje ndaj “deklaratave provokuese dhe kërcënimeve të disa zyrtarëve perëndimorë në lidhje me Federatën Ruse”, tha Ministria e Mbrojtjes Ruse në një deklaratë.
