Atmosferë spektakolare dhe mbi 80 mijë tifozë të pranishëm në “Signal Iduna Park” në barazimin 1-1 mes Dortmundit dhe Liverpoolit.
“You’ll Never Walk Alone” (Ti kurrë nuk do të ecësh vetëm) mbizotëroi në shkallët e impiantit për thuajse të gjithë takimin. Një këngë me të cilën identifikohen si Dortmundi, ashtu edhe Liverpool.
Trajneri Jurgen Klopp u rikthye në shtëpi dhe tifozët vendas nuk i kishin harruar shtatë vite të mrekullueshme që kaluan bashkë, prandaj ata i rezervuan një pritje të veçantë ish-it të tyre.
Trajneri përshëndeti të gjithë tifozët duke qëndruar edhe për pak momente në mesin e fushës e duke shijuar atmosferën, por u kap edhe duke vëzhguar lojtarët vendas, duke bërë që të shpërthejë ironia në rrjete sociale.
Ai takoi edhe trajnerin aktual të Dortmundit, drejtorin teknik si dhe stafin tjetër të ish-skuadrës së tij.
Organizatorët e ndeshjes u kujdesën edhe që trajneri karizmatik të mos “ngatërronte” dhomën e zhveshjeve. Në rrjetet sociale u publikua një foto nga ambientet e brendshme të stadiumit, ku ishte vendosur edhe një tabelë për t’i treguar Kloppit dhomën e zhveshjeve të miqve.
Gjithashtu, platforma dixhitale gjermane “Sport 1” i ka dedikuar trajnerit një kamera gjatë gjithë lojës, dhe shikuesit në ekran patën mundësi të zgjidhnin të shohin vetëm trajnerin e Liverpoolit përmes opsionit “Klopp Cam”.
