Kryetari i Lidhjes Demokratike të Kosovës, Lumir Abdixhiku, ka bërë një reagim në Facebook pasi u publikuan disa komunikime të brendshme mes anëtarëve të Kryesisë së kësaj partie në Viber, ku flitet për një “skeme të organizuar kriminale” lidhur me votat me postë të mërgatës.
Në komunikimet e publikuara sot, janë mesazhet e Kujtim Shalës, Arben Gashit, Armend Zemajt dhe Avdullah Hotit. Gashi në këtë komunikim këmbëngulte se ka pasur vjedhje të votave dhe insistonte që skemës, që sipas tij u orkestrua nga disa bashkëpartiakë, t’i vihet emri “skemë kriminale”.
Abdixhiku i ka cilësuar këto si “sulmet e sinkronizuara ndaj LDK-së”.
“Në këto sulme të paramenduara e në sinkron, janë bërë bashkë kundërshtarët e rinj e të vjetër të Lidhjes; dhe gjithë ata që ndjejnë se kanë humbur hapin me hapjen e madhe që në LDK ka ndodhë, po ndodhë dhe do të ndodhë”, ka shkruar ai.
Tutje, ai ka deklaruar se këto janë tema të brendshme, për të cilat ka thënë se janë diskutuar tashmë në Kryesi.
“LDK i beson institucioneve tona në çdo drejtim; dhe në këtë drejtim. Ne nuk bëjmë as prokurorinë e as gjyqësinë. LDK i ka besuar institucioneve tona edhe kur ka fituar në tri nivele betejën e tentim anulimit të votave tona me partinë në pushtet. Tri fitore në tri nivele – sepse vota jonë është e shenjtë dhe e drejtë! Prandaj dhe fitorja ligjore. Nga opozita, nga vendi i tretë, nga pozicioni i sulmuar nga të giithë përnjëherë! E drejta megjithatë triumfon!”, ka shkruar Abdixhiku.
Sipas tij, kështu po tentohet të nënshtrohet LDK’ja.
“E vërteta është e thjeshtë. Krejt e thjeshtë dhe e drejtë! LDK po qëndron për veten; dhe nëpërmjet vetes dhe për Republikën. E sepse po qëndron si e tillë, edhe po sulmohet nga të tjerët. S’janë mësuar të na shohin kështu. Nuk e pranojnë kështu! Prandaj janë bashkë si një kundër LDK-së! Duan ta thyejnë, ta ligin, ta bëjnë të dorëzohet, dhe kështu nënshtrohet!”, ka shkruar tutje ai.
