Kryetari i Komunës së Skenderajt, Bekim Jashari, ka thënë se çdokush është i mirëseardhur ta vizitojë komunën e tij.
Reagimi i tij vjen pas sulmit që iu është bërë pas tubimit elektoral që mbajti kreu i Lëvizjes Vetëvendosje, Albin Kurti. Jashari, përmes ‘Facebook’-ut tha se secili ka të drejtë të shprehë bindjet e tij politike.
Tutje, ai ka thënë se është i lirë kushdo që ia mësyn ta vizitojë për këtë komunë.
Postimi i plotë i tij:
Të dashur qytetarë,
Jetojmë në kohën e pluralizmit politik, në kohën e demokracisë liberale, ku mendimi i lirë politik, bindja politike është e drejtë fundamentale dhe e garantuar me ligj.
Secili nga Ne ka të drejtë të shprehë bindjet e tij politike e partiake, në menyrë demokratike kudo në Kosovë.
Shoqëria jonë, bazuar në sfidat e së kaluarës, më së miri i di dhe i vlerëson liritë dhe të drejtat e njeriut.
Komuna që unë udhëheq, është e të gjithë shqiptarëve që ia duan të mirën vendit, andaj secili nga ta është i lirë dhe i mirëseardhur kurdo dhe pa asnjë brengë.
Për këtë kam punuar dhe do të vazhdoj të punoj pa rreshtur.
