Kryetari i Prishtinës, Shpend Ahmeti, ka reaguar për debatin e ngritur në lidhje me ndryshimin e emrit të rrugës Radovan Zogoviq, në Prishtinë.
Ndërrimi i emrit ka ngjallur debat nga shoqëria civile dhe mediat, duke e konsideruar si jo korrekte pasi, Zogoviq është mik i shqiptarëve, transmeton Indeksonline.
Ahmeti përmes një postimi në rrjetin social facebook ka thënë se përgjegjësia e ndryshimit të rrugëve është në dorën e Kuvendit Komunal ku përmes një komisioni caktohen edhe emrat.
Ai ka thënë se emri i Zogoviqit do të vendoset në një rrugë tjetër.
Ky është postimi i plotë i Ahmetit në Facebook:
1. Përgjegjësine për emrat e rrugëve e ka Kuvendi Komunal. Kuvendi cakton një komision i cili përgatit rekomandimet dhe pastaj i dërgon në Kuvend për aprovim.
2. Në vitin 2015 Kuvendi Komunal ka emëruar 2,200 rrugë të Prishtinës, pas rekomandimeve të komisionit pas debateve në bashkësi lokale.
3. Komisioni ka rekomanduar ndërrimin e vendit të rrugës Radovan Zogoviq pas shumë ankesave nga lagja. Tash një rrugë tjetër e ka emrin Radovan Zogoviq. E njejta ka ndodhur në komision edhe me rrugen Kosta Novakoviq e cila është zhvendosur si emër ne një rrugë dytësore, ndërsa rruga që e ka pasur Kosta Novakoviq tash e ka emrin Ukshin Hoti.
Në fund më duhet të ceki që si kryetar i komunes mendoj se Radovan Zogoviq meriton rrugë në Prishtinë, ashtu sic mendoj edhe për Kosta Novakoviq. Sot më vjen mirë kur shoh debat në mbrojtje të poetit Zogoviq. Sic e thashë, ky emër është zhvendosur në rrugë tjetër edhe pse mendoj se nuk do duhej të lëvizte fare.
