Të menjëhershme kanë qenë reagimet e mediave ndërkombëtare për zgjedhjen e Hashim Thaçit President i Kosovës. Kështu, Agjensitë më të mëdha të lajmeve në botë, Reuter, AP, DPA, AFP dhe APA njoftojnë se Ish-udhëheqësi i kryengritësve nga Kosova Hashim Thaçi (47), është zgjedhur të premten president të ri të Kosovës. “Ministri i Jashtëm dhe Zëvendëskryeministri ka marrë mbështetjen e 71 prej 120 deputetëve në zgjedhjen e bërë nga nga parlamenti në Prishtinë. Kundërshtari i tij Rafet Rama nuk e mori asnjë votë kurse dhjetë fletëvotime ishin të pavlefshme”, njoftojnë agjensitë e lajmeve botërore.
Mëpas mediat njoftojnë se Hashim Thaçi nuk mundi ta marrë këtë post përmes raundit të parë, e as përmes atij të dytë. Përderisa në raundin e parë, ai mori vetëm 50 vota, në të dytin arriti t’i sigurojë 64 kurse në të tretin 71 Vota. Mediat ndërkombëtare pokështu njoftojnë edhe për tensionet e mëdha në Kuvendin e Kosovës dhe protestat e përditshme nga Opozita./Gazeta Blic/
