Perparim Rama
Pre e një sulmi të qenve endacak, ka qenë sot një tjetër grua në rrugën “C” në kryeqytet. Përparim Rama ka premtuar ndërtimin e një strehimoreje për qenë, por thotë se kjo nuk mjafton.
Për rastet e shtuara të sulmeve nga qentë endacak të qytetarëve në Prishtinë ka reaguar edhe kryetari Përparim Rama.
“Me shqetësim pashë sot pamjet, ku një qytetare e Prishtinës sulmohet nga qentë endacakë! Ne jemi të vetëdijshëm për problemin shumë kompleks që kemi para vetes dhe në këtë drejtim kemi ndërmarrë disa veprime, si trajtimi i qenve endacakë përmes procesit KSVL (Kap, Sterilizo, Vaksino, Lësho) dhe hapjes së 18 pikave të reja ushqyese”.
I pari i Prishtinës edhe njëherë ka premtuar ndërtimin e një strehimoreje për qenë, por sipas tij as kjo mund të mos mjaftojë për eliminimin e problemit.
“Gjithashtu, po punojmë dhe kemi filluar procedurat për ndërtimin e strehimores për qentë. Por, kjo nuk mjafton për të eliminuar në tërësi këtë problem”.
Ai ka kërkuar bashkëpunim të gjerë për problemin në fjalë, duke përfshirë Qeverinë dhe komunat tjera.
“Ky problem kompleks nuk mund të zgjidhet vetëm nga Komuna e Prishtinës, andaj kërkojmë bashkëpunim dhe bashkërendim të veprimeve edhe me Qeverinë e Kosovës dhe Komunat e tjera”, deklaroi tutje Rama.
