Mbledhja e përbashkët e qeverive të Serbisë e të Kosovës do të mbahet pas një muaji në Nish, transmeton REL në gjuhën serbe. Të pranishëm në këtë mbledhje do të jenë edhe përfaqësuesit e Kosovës, thotë njoftimi.
Radio Evropa e Lirë në serbishte thekson se informacioni mbështetet në burime të afërta me autoritetet e Beogradit.
Hollësitë rreth kësaj mbledhjeje ende nuk dihen, por tash për tash supozohet se në këtë mbledhje nuk do të marrë pjesë presidenti i Kosovës, Hashim Thaçi, e as kryeministri i Kosovës, Isa Mustafa, por përfaqësues politikë të niveleve më të ulëta.
Delegacionin e Shqipërisë do ta drejtojë kryeministri i këtij vendi, Edi Rama.
Mbledhja në Nish, që ndodhet në fazën e planifikimit, është iniciuar nga Beogradi, ndërsa sipas konceptit ajo nuk do të jetë vetëm dialog midis shtetit të Shqipërisë e të Serbisë, por dialog mbi raportet e serb[ve e të shqiptarëve në rajon. Prandaj do të ftohen edhe përfaqësuesit politikë të shqiptarëve nga Kosova.
Në këtë mbledhje, sipas burimeve të REL në gjuhën serbe të afërta me Qeverinë e Serbisë, do të marrin pjesë edhe biznesmenë serbë e shqiptarë nga rajoni, ndërsa vazhdon të punohet në hartimin e listës së pjesëmarrësve, përfshirë këtu edhe përfaqësuesit politikë nga Kosova.
Mbledhja në Nish do të mbahet në kuadër të bashkëpunimit për zhvillimin e infrastrukturës, që përfshin edhe ndërtimin e përbashkët të autostradës Nish-Tiranë.
Të rikujtojmë se kryeministri i Serbisë, Aleksandar Vuçiq gjatë konferencës së përbashkët me zëvendëspresidentin amerikan, Joe Biden, tha se kryeministri i Shqipërisë Edi Rama do të vizitojë Serbinë gjatë muajve të ardhshëm.
