Ditët dhe muajt në vijim do të jenë shumë të nxehtë për Kosovën. Gazeta Blic nga burime ndërkombëtare ka marrë vesh se në Kosovë pritet të ketë arrestime të shumta për krim të organizuar dhe për veprime tjera të paligjshme. Në mesin e të arrestuarve, sipas burimeve pritet të ketë edhe “peshq të mëdhenj”.
“Janë dy opsione kohore që po përmenden sa i përket mundësisë së një “uragani” arrestimesh të “peshqve të mëdhenj”. Sipas opsionit të parë, arrestimet mund të ndodhin përgjatë këtyre dy javëve, dhe nëse këto arrestime nuk ndodhin tash, atëherë vjeshta do të jetë edhe më e nxehtë”, ka theksuar ky burim i Gazetës Blic.
Gjithnjë sipas këtyre burimeve, janë të paktën 3 ose 4 “peshq të mëdhenj” që do të bien në këtë aksion.
Megjithatë, këto burime nuk kanë dhënë detaje se kush mund të jenë të arrestuarit, por që dyshohet se ata janë të përfshirë në krim të organizuar dhe në veprime tjera kriminale.
Ndërkaq, para disa javësh, ishte arrestuar njëri nga njerëzit më të fuqishëm në Kosovë, Azem Syla, nën dyshimin për tjetërsim të paligjshëm me prona. Ky grup kriminal, sipas Prokurorisë i përbërë nga më shumë se 50 persona, dyshohet se kanë përfituar në mënyrë të paligjshme dhjetëra miliona euro.
Ish- komandanti i përgjithshëm i Ushtrisë Çlirimtare të Kosovës, Azem Syla tashmë gjendet në paraburgim.
Në vjeshtë ndërkaq, është paralajmëruar se do të mund të funksionalizohet edhe Gjykata Speciale, e cila do të merret me krimet e supozuara të luftës, të kryer nga ana e Ushtrisë Çlirimtare të Kosovës. Gazeta Blic kishte raportuar se do të jenë hiq më pak se 11 ish- udhëheqës të lartë të luftë së UÇK-së që do të akuzohen nga kjo gjykatë, nën dyshimin për krime lufte.
Gazetari Milaim Zeka kishte përmendur emrat e disa prej komandantëve të luftës që do të jenë të akuzuar nga Gjykata Speciale. Ai në këtë liste kishte futur edhe presidentin e vendit, Hashim Thaçi, kryetarin e Kuvendit, Kadri Veseli, emrin e ish- komandantit të përgjithshëm të UÇK-së, Agim Çeku etj./ Gazeta Blic
