Presidenti i Atletico Madridit, Enrique Cerezo, ka rikujtuar se klubi i tij e ka mposhtur Juventusin në të kaluarën dhe e ka në plan ta bëjë të njëjtën gjë edhe në 1/8 e finales në Ligën e Kampionëve.

Skuadra spanjolle është vënë përballë kampionit italian në shortin për fazën e parë të eliminimit direkt në garën më të madhe evropian për klube.

Ndërsa këto ekipe kanë luajtur për herë të fundit në fazën grupore në edicionin 2014/2015. Asokohe, Atletico e kishte mposhtur Juven në Madrid (1-0), ndërsa ndeshja në Torino ishte mbyllur baras (0-0).

Rojiblancos e kishin fituar grupin (ku bënin pjesë edhe Olympiacosi dhe Malmo), por Bianconerët arritën deri në finale (ku u mposhtën nga Barcelona).

“Nuk është hera e parë që kemi luajtur kundër tyre, ndërsa edhe kemi fituar”, ka thënë Cerezo në një prononcim për AS.

Presidenti i Atletico Madridit, Enrique Cerezo (Foto: Carlos Alvarez/Getty Images/Guliver)

“Motivim për ne është fakti se finalja do të luhet në stadiumin tonë”, ka shtuar presidenti i Atleticos.

Kujtojmë që finalja e Ligës së Kampionëve do të zhvillohet më 1 qershor 2019 në Wanda Metropolitano në Madrid. /Telegrafi/