Lionel Messi premtoi njëherë që do ta ndihmonte Neymarin të fitonte Topin e Artë gjatë karrierës së tij, por kjo nuk ndodhi kurrë.
Messi i premtoi Neymarit se do ta ndihmonte ta fitonte Topin e Artë në një përpjekje të fundit për ta mbajtur brazilianin te Barcelona, para se ai të kalonte te PSG.
Neymar iu bashkua Barcelonës nga Santos në vitin 2013 dhe fitoi dy herë La Ligën, tre herë Copa del Rey, si dhe Ligën e Kampionëve dhe Kupën e Botës për Klube. Braziliani ishte pjesë e treshes së frikshme të sulmit në Barcelonë bashkë me Messi dhe Luis Suárez.
Në 409 ndeshjet që ‘MSN’ luajtën së bashku te Barcelona, ata shënuan 344 gola dhe dhanë 157 asistime. Treshja dukej se do ta dominonin futbollin për vite me radhë, por në vitin 2017, Neymar mori vendimin befasues për të lënë Barcelonën dhe për t’u transferuar te PSG.
Ky transferim ndryshoi plotësisht tregun e transferimeve për shkak të klauzolës së lirimit prej 198 milionë funtesh që PSG pagoi për shërbimet e Neymarit, megjithatë Messi ishte dëshpëruar dhe dëshironte që shoku i tij të qëndronte.
Sipas raportit të Ivan San Antonio nga Sport, Messi do ta takonte Neymarin vetëm disa ditë para transferimit dhe i premtoi brazilianit Topin e Artë nëse do të qëndronte te Nou Camp.
Raporti thotë se Messi i tha Neymarit: “Çfarë do? Dëshiron të fitosh Topin e Artë? Do të bëj që të fitosh Topin e Artë.”
Biseda e supozuar ndodhi në Hotelin Sheraton Parsippany në New Jersey, ndërsa Barcelona po përgatitej për t’u përballur me Juventusin në fazën përgatitore, ndeshje që mund të ishte e fundit për Neymarin në klub.
Neymar kishte qenë njeriu kyç për Barcelonën në rikthimin e jashtëzakonshëm 6-1 kundër PSG, por Messi ende ishte figurë kryesore e këtij rezultati për shtypin spanjoll.
Zërat në atë kohë në Spanjë pretendonin se ky ishte momenti kur Neymar e kuptoi që duhej të largohej për të arritur qëllimin e tij, duke qenë se sulmuesi duket se nuk mund të shkëputej nga hija e Messit.
Pas konfirmimit të kalimit të Neymarit në Paris, Messi publikoi një mesazh lamtumire në Instagram për shokun e tij të mëparshëm të ekipit.
“Ishte një kënaqësi e madhe të kem ndarë këto vite me ty shoku im @neymarjr. Të uroj fat në këtë fazë të re të jetës tënde”, postoi ai.
Në një intervistë të fundit në podcast-in e ish-yllit të Brazilit, Romario, Neymar zbuloi arsyen e vërtetë pas kalimit të tij.
“Nuk ika nga Barça për të qenë lojtari më i mirë në botë te PSG,” tha Neymar për 442. “Messi më pyeti: ‘Pse po largohesh? Dëshiron të jesh lojtari më i mirë në botë? Unë mund të të bëj lojtarin më të mirë në botë.’ I thashë: ‘Jo, nuk është kjo, është diçka personale’”.
“Sigurisht, financiarisht ishte më mirë se sa çfarë kisha te Barcelona dhe kishte brazilianë atje gjithashtu. Doja thjesht të luaja me brazilianët. Kishim Thiago Silva, Dani Alves që sapo kishte nënshkruar, Marquinhos, Lucas Moura. Ata ishin të gjithë miqtë e mi”, shtoi ai.
