Flokët biond, pak të rëna, një bluzë të zezë, xhinse dhe këpucë të zeza, rreth 1 e 80 i gjatë, i dobët, rreth 30-40 vjeç.

Ky është identikiti i personit që dyshohet se ka abuzuar me një vajzë 6-vjeçare në korridorin e pallatit në zonën ‘Paolo Sarpit’, në zemër të lagjes së kinezëve në Milano, shkruan ‘Tgcom’.

Ka qenë pikërisht policia italiane ajo që ka publikuar fotot e pedofilit, ndërsa i bën thirrje qytetarëve që të ndihmojnë për identifikimin e personit në fjalë. Deri më tani nuk dihet identiteti dhe kombësia e personit në fotot, ndërsa hetimet vazhdojnë.