Ka përfunduar pa rezultate edhe një raund bisedimesh ndërmjet delegacioneve të Kosovës dhe Serbisë, i mbajtur në Bruksel, për çështjen e kodit telefonik. Takimi, sipas një komunikate të lëshuar nga zyra e ministres për Dialogun në Qeverinë e Kosovës, Edita Tahiri, ka zgjatur rreth 20 orë.
Në agjendë, temë kryesore ishte përfundimi i hapave drejt marrjes së kodit telefonik shtetëror për Kosovën, 383 nga ana e ITU-së (Organizata Ndërkombëtare e Telekomunikacionit).
I njëjti takim nga pala serbe ishte paralajmëruar se do të ketë në agjendë edhe çështjen e themelimit të Asociacionit të komunave me shumicë serbe në Kosovë.
Por, në reagimin e delegacionit të Kosovës thuhet se “ky takim ka qenë vetëm për çështjet e kodit telefonik dhe se përfaqësuesi i Serbisë, Marko Gjuriq, ka gënjyer kur ka thënë se në Bruksel do të bisedohet për asociacionin”.
Tutje, Zyra e ministres për Dialog, Edita Tahiri, sqaron se “përkundër angazhimeve të delegacionit të Qeverisë së Kosovës dhe Bashkimit Evropian që çështja e telekomit të përmbyllet në këtë raund bisedime, kjo nuk është arritur”.
Delegacioni i Kosovës, sipas komunikatës së ministres Tahiri, ka mbrojtur qëndrimin që marrëveshja për telekomin duhet të bazohet në ligjet dhe kornizën rregulltore të telekomunikacionit të Kosovës. Prandaj, ka kërkuar që edhe zgjidhjet teknike zbatuese duhet të jenë plotësisht me ligjet e Republikës së Kosovës.
Kurse delegacioni i Serbisë, sipas ministres Tahiri, ishte munduar që në disa çështje procesi i zbatimi të dalë jashtë ligjeve të Kosovës.
Në këtë takim, sipas komunikatës së Ministrisë së Dialogut, pala serbe ishte jo serioze dhe kohë-pas-kohe konfuze dhe e pa pakoordinuar.
Mungesën e rezultateve konkrete e ka konfirmuar edhe shefi i Zyrës për Kosovën në qeverinë e Serbisë, Marko Gjuriq. Ai ka thënë se marrëveshja për çështjen e telekomunikacionit nuk është arritur, pavarësisht se dallimet mes palëve janë të vogla.
Gjuriq u ka thënë medieve serbe se ka insistuar deri në fund që t’i mbrojë interesat e Serbisë, duke u bazuar në marrëveshjen politike të arritur në nivel të kryeministrave më 25 gusht vitin e kaluar.
Mungesa e kodit telefonik, sipas të dhënave të Qeverisë, i ka shkaktuar deri më tani Kosovës humbje prej 200 milionë euro.
Sipas marrëveshjes së 25 gushtit të vitit të kaluar, Kosova pritej që në këtë vit të pajisej me Kodin me prefiksin e ri që do të zëvendësonte atë të Serbisë. Aktualisht në Kosovë ekzistojnë tre operatorë të telefonisë mobile dhe fikse, të cilët shfrytëzojnë kode të huaja ndërkombëtare.
Telefonia mobile “Vala” shfrytëzon kodin e Monakos (+377), ajo e IPKO-s kodin e Sllovenisë (+386), kurse telefonia fikse shfrytëzon kodin (+381) të Serbisë, e për të cilat Kosova duhet të paguajë kosto të lartë të shpenzimeve.
Pasi që nuk është vend anëtar i Kombeve të Bashkuara, Kosova ishte paraparë që kodin ta merrte përmes Austrisë, e cila do të aplikonte tek ITU-ja dhe më pas, të njëjtin kod do t’ia dorëzonte Kosovës, transmeton rel.
Megjithatë, mosmarrëveshjet ndërmjet Kosovës dhe Serbisë vazhdojnë, sidomos në aspektet e aplikimit të marrëveshjes.
