Në fjalën e saj në këtë Akademi, Mimoza Kusari – Lila e ka kujtuar Gentin si njërin prej njerëzve dhe bashkëpunëtorëve të saj të palodhshëm, i cili me punën dhe angazhimin vetëmohues, shpesh ka ditur të kthehet edhe në motiv dhe udhërrëfyes për të tjerët, në veçanti për brezat e rijnë.
“Genti ishte njëri prej atyre që gjithmonë ishte i gatshëm të jepte nga vetja, por asnjëherë të kërkonte diçka për veten e tij. Ne, miqtë, bashkëpunëtorët dhe familjarët e tij duhet të jemi krenar për një njeri të tillë. Duhet të jemi krenar që e patëm dhe ta kujtojmë gjithmonë ashtu siç ishte”, ka thënë Kusari – Lila.
Sipas një njoftimi të Komunës së Gjakovës, në emër të kolegëve të tij të Asamblesë Komunale, ka folur këshilltari Hasan Krasniqi, ndërsa në emër të familjes ka folur vajza e të ndjerit, Engji. Në këtë akademi gjithashtu ë shtë shfaqur edhe një film i shkurtër, në të cilin bashkëpunëtorët dhe miqtë e Gentit kanë folur për përvojat jetësore me të ndjerin.
Në nderim të jetës dhe veprës së Gent Ollonit, para akademisë përkujtimore, janë bërë edhe homazhe dhe janë vendosur kurora me lule para varrit të të ndjerit.
Homazhe e nderime kanë bërë edhe kryetarja e komunës Mimoza Kusari – Lila, Këshilltarë komunalë si dhe familjarë, bashkëpunëtorë e miq të Gentit.
