Instituti për Zhvillimin e Politikave Sociale me anë të një letre të hapur i ka kërkuar kryeministrit Albin Kurti që politikat sociale dhe mirëqenien e familjes t’i trajtojë me prioritet.
Në këtë letër të hapur, të publikuar të martën, ky institut ka ngritur shqetësime për mosekzistimin e Ministrisë së Punës dhe Mirëqenies Sociale, si një ministri e vetme, në strukturën e re qeverisëse. Sipas tyre, ende nuk është e qartë se ku do të bartet departamenti përkatës, i cili merret me politikat sociale dhe familjen, shkruan sot “Koha Ditore”.
Sipas ristrukturimit të ministrive në Qeverinë e re, në Ministrinë e Ekonomisë, Punësimit, Tregtisë, Industrisë, Ndërmarrësisë dhe Investimeve Strategjike, e cila do të udhëhiqet nga Rozeta Hajdari, do të fuzionohen Ministria e Punës dhe Mirëqenies Sociale, ajo e Zhvillimit Ekonomik, Ministria e Tregtisë dhe Industrisë, si dhe dikasteri i Ndërmarrësisë i Ministrisë së Inovacionit dhe Ndërmarrësisë.
Gazeta ka kërkuar përgjigje lidhur me planin për funksionimin e këtyre dikastereve në një të vetme, nga Zyra për medie e Qeverisë dhe nga zyrtarë të kabinetit të kryeministrit Albin Kurti, por ata që nga e hëna nuk kanë kthyer përgjigje.
(Artikullin e plotë mund ta lexoni sot në “Koha Ditore”)
