Zbulohen disa nga emrat e vendeve që tradhtuan nismën e presidentit Michel Platini për të shmangur rizgjedhjen e Sepp Blatter në krye të FIFA-s. Sipas “Daily Mail” janë afërsisht 18 shtetet që u rebeluan gjatë votimit duke mos respektuar vullnetin e UEFA-s, që kishte përcaktuar një platformë të qartë kundër një mandati tjetër të 79-vjecarit zviceran. Spikatin vende të tilla si Spanja dhe Franca që iu bashkangjitën bllokut lindor, duke dalë hapur kështu kundër urdhrave të qeverisë europiane. Pozicioni i Rusisë ishte i qartë prej kohësh për shkak edhe të përkrahjes publike të vetë numrit 1 të Kremlinit Vladimir Putin, që në mënyrë të kuptueshme i është mirënjohës presidentit Blatter për zhvillimin e Kupës së Botës në vitin 2018 megjithatë cudi përbëjnë shtete të tilla si Franca vendi i Platinisë apo dhe Spanja. Këto janë dy vende që përfitojnë ndjeshëm nga investimet që vijnë nga Katari, madje në vitin 2010 drejtuesit e këtyre dy federatave votuan Katarin për të organizuar kampionatin botëror të vitit 2022, sidoqoftë si Franca ashtu edhe Spanja në këtë rast thyen aleancën e krijuar duke mos mbështetur kandidaturën e Princit Ali bin Al – Hussein në zgjedhjet e ditës së premte. Teksa Blatter bëhet gati për të filluar mandatin e tij të pestë princi jordanez nisi analizën e rezultatit përfundimtar, për të kuptuar sesi më shumë se 1/3 e Federatave Europiane të Futbollit nuk e përfillën kërkesën e presidentit Michel Platini për të mbështetur në bllok kandidaturën e tij. Sipas një burimi pranë Ali Bin al Hussein janë 18 federatat nga UEFA që kanë votuar pro Blatter-it, që grumbulloi 133 vota gjithsej krahasuar me 73 të Princit Ali. Shumica e votave në favor të princit jordanez mendohet se erdhën nga përtej oqeanit, ndërkaq sipas një veterani të FIFA-s, që natyrisht ka refuzuar që t’i publikohet emri, mes shteteve të tjera që kanë mbështetur zviceranin bëjnë pjesë gjithashtu edhe vende të tilla si Turqia, Qipro dhe Finlanda. Rezultati befasues i ditës së premte solli menjëherë reagimin e Presidentit Michel Platini që kërkoi një mbledhje urgjente për ditën e shtunë në Berlin, pikërisht ditën e finales së Champions League, për të reflektuar dhe për të kuptuar më mirë atë që ndodhi ditën e zgjedhjeve, gjithsesi është mëse e qartë që nuk do të ketë kurrfarë bojkoti për dy kupat e ardhshme të botës./supersport.al/
