Ndarja e mjeteve në vlerë prej 300 mijë euro për mjeket specialistë, ka ngjallë debat në Kuvend.

Kryetar i Komisionit për Buxhet dhe Financa, deputeti i LDK-së Naser Osmani, tha se janë ndarë mjete në vlerë prej 300 mijë euro për mjeket specialistë të papunë.

“Është bërë ndarja e buxhetit prej 300 mijë euro, për pagesën e specialistëve të mjekësisë. Është zgjidhje e përkohshme. Komisioni i rekomandon ministrit të Shëndetësisë që ta hartojë listën e saktë të specialistëve që janë të papunë”, tha Osmani.

Në lidhje me këtë foli shefi i GP të PDK-së, Adem Grabovci, i cili tha se mjetet janë ndarë për specialistët por duhet të futen dhe specializantët, në mënyrë që t’u krijohet mundësia që ta ndjejnë veten të barabartë me të tjerët.

E për këtë ka reaguar deputeti Gëzim Kelmendi, i cili tha se çështja e mjekëve specialistë, është politizuar, në mes të rivalëve të koalicionit PDK-LDK. E kritika pati dhe deputetja e VV-së Besa Baftiu, e cila tha se Adem Grabovci dhe dy partitë në pushtet, po duan të përfitojnë politikisht nga kjo çështje.

“Adem Grabovci deshi të përfitoj me përkrahjen e specialistëve dhe specializantëve të papunë dhe pa rroga që kryejnë specializimin. Dy grupet në pushtet po duan të përfitojnë politikisht nga kjo çështje”, tha ajo. E menjëherë pati reagim nga Grabovci i cili tha se s’ka nevojë për fushatë, pasi që ai i ka votat e sigurta. “ Është e vërtetë se këtu çdo gjë po bëhet për politikë. Por në fund të fundit në politik jemi. Skam nevojë me ba fushatë se i kam votat e sigurta sa herë që dalim në fushatë”, tha Kelmendi.

E Baftiu tha se është e vërtetë që Grabovci i ka votat, pasi që e kanë dhe buxhetin dhe i blejnë ato.