Kryetari i AKR’së, Behgjet Pacolli ka reaguar ashpër pas skandalit që ka bërë EBU me flamurin e Kosovës. Pacolli në një postim në Facebook ka thënë se fajet për këtë duhet t’i mbaj diplomacia e Kosovës dhe ambasadori ynë në Stokholm të Suedisë. Ai ka bërë me dije se për këtë çështje ka kërkuar sqarime edhe nga Sietse Bakker, drejtor i eventit në EBU.
Ky është reagimi i plotë i Pacollit:
Moslejimi i flamurit të Kosovës në Eurosong 2016 në Stokholm të Suedisë nga EBU është fyerje e rëndë për Republikën e Kosovës. Çuditërisht asnjë qeveritar për këtë nuk reagon. Diplomacia kosovare duket qartë që është në nivelin më të ulët. Pse nuk ka reaguar Ambasadori ynë në Stokholm?
Flamuri i Kosovës rënditet së bashku me flamurin terrorist të ISIS-it, gjë e cila është krejtësisht e papranueshme dhe shumë fyese për ne.
Unë personalisht kam kërkuar sqarim nga z. Sietse Bakker, drejtor i eventit në EBU për këtë skandal!
