Analisti Rrahman Paçarizi, ka thënë se në vitet 2018 dhe 2019, LDK sillej si satelit i LVV-së, dhe se kandidatja e atëhershme për kryeministre nga kjo parti, Vjosa Osmani, sipas Paçarizit, dukej se e përcillte në televizion se çfarë thoshte Albin Kurti, dhe i përsëriste fjalët e tij.
“LDK sillej si satelit i VV-së. Vjosa Osmani dukej se e ndiqte në televizion se çka thoshte Albin Kurti, dhe i përsëriste fjalët e Albin Kurtit. Ajo parti nuk ka sukses, është e gjykuar të dështoj”, ka thënë Paçarizi në Rubikon të Klan Kosova.
“LDK ka dalë nga diskursi i vetë, diskursi të cilin e ka ndjekë LDK në vitet 2018-19, sidomos me Vjosa Osmanin, nuk është diskursi i Lidhjes Demokratike të Kosovës, LDK nuk flet ashtu, nuk mendon ashtu, nuk vepron ashtu”.
Tutje Paçarizi tha se edhe pse ish-kryeministri Isa Mustafa kritikohet, sipas tij, ai ka qenë kryeministri më i mirë i Kosovës, dhe po ashtu kryetari më i mirë i Prishtinës.
“Isa Mustafa është ai të cilin e kritikojmë pa dhimbje, mirëpo, kur flitet se kush ka qenë kryeministri më i mirë i Kosovës, është Isa Mustafa, kush ka qenë kryetari më i mirë i Prishtinës, është Isa Mustafa, domethënë prapë kthehesh tek Isa Mustafa, dhe kjo është goxha absurde”, u shpreh Paçarizi.
