Organizata e Veteranëve të Luftës së Ushtria Çlirimtare e Kosovës (OVL-UÇK) ka reaguar lidhur me shtyrjen e vendimit për ish-udhëheqësit e UÇK-së në Hagë, duke e cilësuar atë si goditje të rëndë ndaj drejtësisë dhe të drejtave themelore të njeriut.
Në një postim në Facebook, OVL-UÇK tha se gati gjashtë vite paraburgim pa vendim përfundimtar përbëjnë, sipas tyre, “dënim pa aktgjykim”.
“Gati gjashtë vjet paraburgim pa një vendim përfundimtar nuk është procedurë. Është dënim pa aktgjykim”, thuhet në reagim.
Organizata thekson se asnjë gjykatë e financuar në emër të demokracisë nuk duhet të normalizojë një trajtim të tillë ndaj ish-krerëve të UÇK-së.
“Asnjë gjykatë e financuar në emër të demokracisë nuk mund të normalizojë një trajtim të tillë ndaj ish-krerëve të Ushtrisë Çlirimtare të Kosovës, lufta e të cilëve i hapi rrugën lirisë dhe shtetësisë së Kosovës”, thuhet më tej.
Sipas OVL-UÇK-së, shtyrjet e vazhdueshme po e thellojnë padrejtësinë dhe po dëmtojnë besueshmërinë e institucioneve të drejtësisë.
“Vonesa thellon një padrejtësi të papranueshme dhe gërryen besueshmërinë e çdo institucioni që pretendon se mbron sundimin e ligjit”, thekson organizata.
Në reagim gjithashtu thuhet se dinjiteti i të akuzuarve dhe familjeve të tyre nuk duhet të mbahet peng i proceseve të zgjatura.
“Dinjiteti i të akuzuarve, i familjeve të tyre dhe i popullit të cilit i shërbyen, nuk mund të mbahet peng i shtyrjeve të pafundme”, thuhet në postim.
OVL-UÇK i ka bërë thirrje shteteve që financojnë dhe mbështesin gjykatën në Hagë që të reagojnë, duke kërkuar respektimin e të drejtave të ish-krerëve të UÇK-së.
