Sot, në fshatin Qyshk të Pejës, kandidatja pë Presidente, Vjosa Osmani dhe kandidati për Kryeministër, Lumir Abdixhiku bënë homazhe pranë lapidarit të të rënëve, në përkujtim të viktimave të Masakrës së Qyshkut, Zahaqit, Pavlanit dhe Llabjanit.
Gjatë homazheve, Osmani dhe Abdixhiku nderuan kujtimin e të gjithë të rënëve dhe ritheksuan domosdoshmërinë që krimet e kryera në Kosovë të mos harrohen kurrë dhe autorët të vihen para drejtësisë.
“Synimi i forcave serbe ishte spastrimi etnik i kësaj pjese dhe shfarosja e popullit shqiptar. Secili nga këta të vrarë është pjesë e historisë së Kosovës, e sakrificës për liri dhe shtet. Drejtësia për viktimat e luftës vazhdon të mbetet obligim institucional dhe kombëtar, sepse paqja e qëndrueshme mund të ndërtohet vetëm mbi të vërtetën dhe drejtësinë”, u tha gjatë homazheve.
Në përvjetorin e kësaj masakre, u bë thirrje për kujtesë të përhershme institucionale dhe qytetare ndaj të gjitha viktimave të luftës në Kosovë, si dhe për angazhim të pandërprerë në kërkim të drejtësisë për krimet e kryera gjatë luftës.
Më 14 maj 1999, forcat e regjimit gjenocidal serb kryen një nga krimet më të rënda ndaj popullatës civile shqiptare në rajonin e Pejës, duke vrarë e masakruar barbarisht 44 civilë në Qyshk, 17 në Zahaq, 21 në Pavlan dhe 13 në Llabjan. Në tërë rrethinën Qyshk–Pavlan–Zahaq–Llabjan, rreth 100 civilë shqiptarë u vranë mizorisht.
