Arsenali dhe Liverpooli u ndalën në një barazim pa gola në “Emirates”, duke i dhënë fund serisë prej shtatë fitoresh radhazi të ‘Gunners’ në të gjitha kompeticionet dhe duke treguar se gara për titull mbetet e hapur.

Arsenali e nisi fuqishëm ndeshjen, me Bukayo Saka shumë aktiv në krahun e djathtë. Sulmuesi anglez detyroi Alissonin në një pritje të ulët pas një depërtimi të rrezikshëm. Megjithatë, një gabim i William Salibas në pasim prapa rrezikoi vendasit, pasi Conor Bradley provoi një parabël që u ndal nga traversa.

Liverpool-i u mbrojt me disiplinë në pjesën e parë, me Milos Kerkez që bëri një bllokim vendimtar për të ndalur sërish Saka-në brenda zonës. Në fillim të pjesës së dytë, Florian Wirtz krijoi panik në mbrojtjen e Arsenalit dhe kërkoi penallti, por arbitri vazhdoi lojën. Probleme shtesë për vendasit erdhën me daljen nga loja të Piero Hincapié për shkak dëmtimi.

Të besuarit e Arne Slot fituan terren pas pushimit. Dominik Szoboszlai ishte figura kryesore, duke provuar disa goditje nga distanca dhe duke tronditur traversën nga një goditje dënimi. Megjithatë, asnjëra skuadër nuk gjeti golin vendimtar.

Në minutat e fundit, Arsenali kishte shansin e artë për fitore, por Gabriel e dërgoi me kokë topin jashtë pas një këndoreje. Një barazim që mban Arsenalin në krye, por lë Liverpoolin të kënaqur me paraqitjen dhe serinë pa humbje.