Nisma Socialdemokrate po kërkon nga Gjykata Speciale që të trajtojë të gjitha krimet e supozuara gjatë luftës në Kosovë, nga kushdo qofshin ato.
Në një konferencë për media, sekretari i kësaj partie, Bilall Sherifi tha se Gjykata Speciale duhet të tregojë nëse e ka ndërmend të merret me hetimin e të gjitha krimeve që kanë ndodhur në Kosovë.
“Qëndrimi i Nismës nuk ka të bëjë me atë me bisedat e mundshme me Jakup Krasniqin. Zonja Trendafilova ka deklaruar se Gjykata Speciale do të trajtojnë krime pa dallime. Kërkojmë vepra dhe jo vetëm fjalë. Nëse deklarimet e tilla nuk janë propagandistike kërkojmë vepra. Kërkojmë me ngulm që Gjykata Speciale të fillojë hetimin e të gjitha krimeve që kanë ndodhur në Kosovë”, tha ai.
Në këtë konferencë Sherifi foli edhe për takimin e paralajëmruar nga kryeministri Hoti, duke bërë të ditur se do të marrin pjesë në çdo takim që ftohet për të mirën e vendit, duke qenë të gatshëm që të diskutojnë qoftë për presidentin apo edhe për zgjedhjet e reja.
Mirëpo Sherifi nuk ka pranuar të tregojë qëndrimin e Nismës mes këtyre dyjave, e që një gjë të tillë do ta bëjnë pas së hënës.
“Nisma nuk ka refuzuar asnjëherë asnjë takim, ka qenë në tavolinë kur diskutohet për fatin e vendit”, tha ai.
