Qytetarët që duan të udhëtojnë me veturat e tyre në vendet e ndryshme të Evropës, duhet të paguajnë çmime të larta për policën e sigurimeve në vendkalimet kufitare të BE-së. Çmimet sillen prej 70 deri në 250 euro për një policë sigurimesh një mujore.
Kanë kaluar 18 vjet prej përfundimit të luftës, ndërsa qytetarët e Kosovës vazhdojnë të paguajnë policia të shtrenjta të sigurimit të automjeteve në mungesë të kartonit të gjelbër. Madje autoritetet në Kosovë po bëjnë përpjekje për të gjetur alternativa për sigurimin e Kartonit të Gjelbër, por procesi rezulton të jetë i vështirë dhe i komplikuar.
Mos anëtarësimi i Kosovës në Organizatën e Kombeve të Bashkuara është pengesa kryesore për anëtarësimin e saj në Këshillin e Byrove Evropiane, që siguron Kartonin e Gjelbër. Por, njohës të kësaj fushe, konsiderojnë se për zgjidhjen e kësaj çështjeje mungon angazhimi i Byrove Kosovare të Sigurimit dhe institucioneve shtetërore.
Blerim Pushkolli është drejtor ekzekutiv në Byronë Kosovare të Sigurimit. Ai ka thënë për Radion Evropa e Lirë, se parakushtet e kërkuara për sigurime janë përmbushur nga ana kosovare, por mos anëtarësimi i Kosovës në Kombet e Bashkuara ka bërë që ky proces të ngec.
Barrierë kryesore mbetet anëtarësimi i Kosovës në Kombet e Bashkuara. Normalisht tani e tutje do të gjejmë ndonjë alternativë tjetër që të përshpejtohet ky proces.
Por, kryesuesi i delegacionit për Kartonin e Gjelbër, i emëruar nga Qeveria e Kosovës, Rrahim Pacolli, i tha Radios Evropa e Lirë, se nga Këshilli i Byrove Evropiane, është kërkuar nënshkrimi i marrëveshjeve të mirëkuptimit me shtetet fqinje që, sipas tij, do të përshpejtonte procesin.
Kosova ka tri memorandume mirëkuptimi me shtetet fqinje, respektivisht me kompanitë e sigurimeve në Shqipëri, Maqedoni dhe Serbi, për njohje reciproke të përgjegjësisë siguruese të automjeteve motorike. Për memorandumin me Malin e Zi, Pacolli thotë se duhet të angazhohen institucionet e larta shtetërore.
Ai thotë se kompanitë e sigurimeve të Malit të Zi, po hezitojnë të nënshkruajnë këtë marrëveshje për shkak të, siç thotë , përfitimeve financiare që kanë nga turistët kosovarë, por me një kërkesë nga autoritetet qeveritare të Kosovës drejtuar autoriteteve zyrtare të Malit të Zi, ato pritet të reflektojnë në këtë drejtim
“Nëse kjo marrëveshje arrihet më Malin e Zi, ne jemi shumë afër marrëveshjes për Karton të Gjelbër. Kompanitë e sigurimeve atje po pengojnë, që është normal, sepse ata dëshirojnë lekë më shumë të marrin nga kosovarët. Por, qeveria e Kosovës duhet të kërkojë nga autoritetet e Malit të Zi, të zgjidhet kjo çështje, që është shumë e rëndësishme, sepse më këtë hapen rrugën në Këshillin e Byrove të Evropës”, tha ai.
Për këtë çështje, Pacolli thotë se ka pasur një takim më presidentin e Kosovës, Hashim Thaçi, zyra e të cilit ashtu si edhe ajo e kryeministrit të Kosovës, nuk ka pranuar të japë ndonjë përgjigje rreth kësaj çështjeje.
Ndërkohë, ekspertë të industrisë së sigurimeve në Kosovë, konsiderojnë se e vetmja formë për të siguruar Kartonin e Gjelbër, është që ndonjë shtet anëtar i Këshillit të Byrove të Evropës të garantojë për Kosovën Kartonin e Gjelbër
Por për këtë, Hashim Rexhepi, profesor në Kolegjin “ Pjetër Budi”, vlerëson se mungon angazhimi i institucioneve kompetente.
“Unë nuk kam parë ndonjë angazhim serioz përveç bisedave, kur ishim në Bruksel, me Serbinë. Dhe unë besoj se këto biseda është dashur të vazhdohen. Unë nuk shoh, qe dy vite, asnjë angazhim në këtë drejtim. Kështu që çështja ka mbetur pezull. Unë mendoj se duhet një diskutim përmbajtjesor dhe një diskutim pro- aktiv në këtë drejtim. Nëse eksiton një gjë e tillë atëherë unë mendoj se mund të arrihet një zgjidhje”, konsideron ai.
Megjithëkëtë, qytetarët që duan të udhëtojnë me veturat e tyre në vendet e ndryshme të Evropës, duhet të paguajnë çmime të larta për policën e sigurimeve në vendkalimet kufitare të vendeve anëtare të BE-së. Çmimet janë të larta, thonë ata, dhe sillen prej 70 deri në 250 euro për një policë sigurimesh një mujore, varësisht në cilën pikë kufitare mund të jetë blerë ajo./albinfo.ch/
